Proqramda iştirak etmək qərarım kifayət qədər qəfil oldu - 2014-cü ilin noyabrında IEC mərkəzi yubileyi şərəfinə bir neçə proqramda aksiya şərtləri ilə iştirak etməyi təklif etdi. Kursların qiyməti cəmi $100 idi və mən heç düşünmədən dili təkmilləşdirmək məqsədilə Londona getməyə qərar verdim, əlbəttə ki, şəhəri və ətrafını görmək fürsətini də qaçırmadım. 16-dan 31 mayadək olan dövrü seçdim, bu kifayət qədər əlverişlidir - şəhər hələ turistlərlə dolu deyil, hava isə artıq demək olar ki, yay havasıdır.

Səyahətə hazırlaşmaq üçün kifayət qədər vaxtım var idi, ona görə də yaxınlıqdakı turizm istiqamətlərini öyrəndikdən sonra Londonda olduğum müddətdə həftəsonu Dublinə uçmağa qərar verdim. Beləliklə, biletlər alındı, gecələmək üçün yerlər bron edildi, unudulmaz tətilə hazıram :)