Վաղուց, երբ ես դեռ շատ փոքր էի, սիրում էի երգել հայտնի «if you are going to San Francisco, be sure to wear some flowers in your hair» երգը եւ այն ժամանակ նույնիսկ երազել չէի համարձակվում, որ մի օր իսկապես կհայտնվեմ Սան Ֆրանցիսկոյում... իմ աչքերով կտեսնեմ Golden Gate Bridge-ը, կքայլեմ նեղ փողոցներով եւ կնստեմ տրամվայ... Բայց կյանքը հաճախ անսպասելի անակնկալներ է մատուցում, եւ ահա ես հայտնվեցի իմ երազանքների քաղաքում։

Օ՜, Սան Ֆրանցիսկո։ Քայլել այս նեղ փողոցներով, բարձրանալով ու իջնելով բլուրներով՝ մեծ հաճույք է։ Այստեղ Golden Gate-ից բացի շատ բան կա տեսնելու։ Սան Ֆրանցիսկոյում դուք կգտնեք Ամերիկայի ամենահին Չայնա-թաունը, որտեղ կարող եք նստել չինական ռեստորանում կամ գնել էժան հուշանվերներ։ Նաեւ անպայման գտեք այն թաղամասը, որտեղից սկսվել է հիպիների շարժումը, որտեղ նեղ փողոցներով զբոսնելիս կարող եք հանդիպել շատ անսովոր եւ հետաքրքիր մարդկանց, մտնել սրճարան կամ պարզապես հանգստանալ պատուհանից լսվող ռեգի երաժշտության ներքո։ Սան Ֆրանցիսկոյում անպայման զբոսնեք այգում, որը, եթե չեմ սխալվում, տարածքով ավելի մեծ է, քան Նյու Յորքի Central Park-ը։ Սուրճ գնեք Starbucks-ում եւ հանգիստ զբոսնեք վիկտորիանական ոճով կառուցված հարմարավետ փողոցներով։ Եվ, իհարկե, մի մոռացեք այցելել Ալկատրաս։ Կղզին, որտեղ գտնվում է հայտնի բանտը, ինքնին շատ գեղեցիկ է, արդեն իսկ այնտեղից բացվող տեսարանների համար արժե էքսկուրսիա վերցնել։ Իսկ բանտը... Ես մինչ օրս սարսուռ եմ զգում, երբ հիշում եմ Ալկատրասը... Սարսափելի վայր է, բայց ինչ-որ բանով այն ձգում է դեպի իրեն... Արժե ընդամենը մի քանի րոպե մտնել խուց, որպեսզի նորից սկսես գնահատել կյանքի եւ ազատության բոլոր հրաշալիքները։