Մեր հաջորդ կանգառը Քի Ուեսթն էր (Key West): Հավանաբար բոլորը չէ, որ գիտեն այս վայրը, ուստի ավելի լավ կլինի բացատրել, որ Ֆլորիդա Քիսը (Florida Keys) Ֆլորիդայի հարավում գտնվող կղզիների շղթա է, իսկ Քի Ուեսթը դրանցից ամենահարավայինն է։

Երեկոյան ժամը 10-ի սահմաններում էր, երբ մեր ավտոբուսը հասավ վերջին կղզի։ Մենք դանդաղ հավաքվեցինք, հորանջելով ու ձգվելով իջանք ավտոբուսից եւ գրեթե ընկանք։ Ես կանգնած էի աստիճաններին՝ ագահորեն շնչելով օդը եւ չէի կարողանում հագենալ։ Ուզում էի լուծվել այդ քաղցր երեկոյան օդի մեջ... Այնտեղ խառնված էր ամեն ինչ՝ ծաղիկների բույրը, ծովային զեփյուռը, անցնող օրվա ջերմությունը եւ սիգարների դառնավուն ծուխը... Կյանքումս առաջին անգամ զգացի, որ կարողանում եմ շնչել։

Չգիտեմ, թե ինչ բառերով է ավելի լավ նկարագրել այս վայրը... Մոռացեք այն ամենը, ինչ գիտեիք Ամերիկայի մասին եւ փորձեք պատկերացնել մի փոքրիկ կղզի, որը մի կողմից ողողվում է Ատլանտյան օվկիանոսով, իսկ մյուս կողմից՝ Մեքսիկական ծոցով։ Որտեղ փողոցներում բազմաթիվ կուբացիներ են, որոնք վաճառում են կոկոս եւ սիգարներ փաթաթում։ Որտեղ պատրաստում են աշխարհի ամենահամեղ կարկանդակը՝ Key West Lime Pie-ը։ Որտեղ ամեն երեկո առափնյա հատվածում տոնում են արեւամուտը՝ կազմակերպելով պարեր, շոուներ եւ հրավառություն։ Կարելի է փորձել պատկերացնել, բայց ավելի լավ է տեսնել սեփական աչքերով։ Հավատացեք, դուք այնտեղ անելիք կգտնեք։ #KeyWest #FloridaKeys