Եվ, իհարկե, ինչպե՞ս առանց զվարճանքների։ Ամենահետաքրքիր վայրը Six Flags-ն էր։ Ես երբեք ոչ մի տեղ այսքան շատ ատրակցիոններ չէի տեսել։ Դրանք պարզապես ատրակցիոններ չէին, այլ հսկայական հրեշներ։ Շատերի վրա նայելն անգամ սարսափելի էր, էլ չեմ ասում՝ նստելը։ Դրանք շատ մեծ էին եւ բաղկացած էին բազմաթիվ ոլորաններից։ Յուրաքանչյուրի վրա մեկ անգամ նստելն ինձ բավական էր, երկրորդ անգամ ես դրանց չէի նստի, շատ էի վախենում։ Հիմնականում բոլոր ատրակցիոններում ես նստում էի փակ աչքերով։ Ամենահանգիստ ատրակցիոնները այգու ջրային հատվածում էին, այնտեղ այդպիսի արագություն չկա, ամեն ինչ հանգիստ է։ Այս այգում կարելի է գտնել ամեն ինչ հոգու համար, զվարճանքների հսկայական բազմազանություն, կան եւ՛ հանգիստ, եւ՛ շունչը կտրող ատրակցիոններ։ Նաեւ այնտեղ կարելի է դիտել երիտասարդ տաղանդների համերգ, մասնակցել տարբեր մրցույթների։ Կարծում եմ՝ յուրաքանչյուրը պետք է այցելի այնտեղ, Ռուսաստանում ես նման ատրակցիոններ չեմ տեսել։
