Կարծում եմ՝ յուրաքանչյուր մարդ ունի երազանք։ Իմ երազանքը միշտ եղել է տեսնել հնարավորինս շատ երկրներ եւ հանդիպել աշխարհի տարբեր ծայրերից եկած հետաքրքիր մարդկանց։ Զարմանալիորեն, Ամերիկան նույնիսկ իմ ցուցակում չէր, քանի որ միշտ կարծում էի, որ դրա համար պետք է գոնե միլիոնատեր լինել կամ բանկ կողոպտել։

Իմ բախտը բերեց, երբ մի անգամ համացանցում թերթելիս հանդիպեցի «America is waiting for you» կոչով գովազդի եւ որոշեցի, որ դա նշան է։ Այդպես սկսվեց իմ երեքամսյա պատմությունը։

Սկզբում գրեթե ոչինչ անելու կարիք չկար։ Ուղարկում էի պահանջվող փաստաթղթերը եւ կատարում հրահանգները։

Մայիսին մոտ ամեն ինչ խառնվեց։ Հայտի հետ կապված որոշ խնդիրներ առաջացան, ուստի ստիպված էի DS-2019 ձեւաթուղթը սպասել սահմանված ժամկետից ավելի երկար։ Կորցրեցի փաստաթղթերի թղթապանակը, բարեբախտաբար, 3 օր որոնումներից հետո գտնվեց։ Չէի կարողանում հարցազրույցը նշանակել ինձ հարմար ժամանակ, ուստի ամեն առավոտ մոնիտորինգ էի անում դեսպանատան կայքը՝ հույս ունենալով տեսնել ինձ հարմար ամսաթիվ, ինչը արդյունքում տվեց իր պտուղները։ Անցնելով բոլոր ձեւական մասերը՝ մնաց միակ եւ ամենահուզիչ քայլը՝ հանդիպումը հյուպատոսի հետ։