ՂԱԶԱԽ ԱՂՋԿԱ ԱՄԵՐԻԿՅԱՆ ԵՐԱԶԱՆՔԸ

Ողջո՛ւյն։ Հուսով եմ՝ հրաշալի օր եք անցկացնում։ Եթե ոչ, ապա վստահ եմ, որ այս էսսեն կբարձրացնի ձեր տրամադրությունը։

Ես Ալուան եմ՝ Ղազախստանի փոքրիկ քաղաքից մի երազկոտ աղջիկ, ինչպես նաեւ համարձակ կին, որն իրականություն է դարձնում իր բոլոր երազանքները։ Ես արդեն գրեթե 18 տարի է, ինչ ապրում եմ Երկիր մոլորակի վրա։ Այս էսսեում կցանկանայի կիսվել իմ փոքրիկ ու զվարճալի ճամփորդության մասին պատմությամբ եւ ամեն ինչի վերաբերյալ իմ անկեղծ մտքերով։

Ինչպե՞ս սկսվեց ամեն ինչ

Երբ տարրական դպրոցում էի, հարազատներս հաճախ էին ճամփորդում աշխարհով մեկ, նրանք տեսել էին օվկիանոսներ, ծովեր եւ լեռներ։ 11-ամյա ես շատ էի հետաքրքրվում դրանով եւ խնդրեցի ծնողներիս ինձ լիճ տանել։ Ուրիշ ոչինչ չէի կարող խնդրել, իսկ ծնողներս էլ ավելի լավ բան թույլ տալ չէին կարող, քանի որ բառացիորեն սնանկ էին։

Երբ ամառը եկավ, ծնողներս ասացին, որ գնում ենք Իսիկ-Կուլ։ Դա հիասքանչ լիճ է Ղրղզստանում։ Այդ ժամանակ ես յոթերորդ երկնքում էի եւ ինձ զգում էի Vogue-ի այն զով աղջկա պես, որը ճամփորդում է «օտար» երկրներ։

Մենք 6 հոգանոց խումբ էինք եւ գրեթե 14 օր ապրում էինք յուրտում այլ ճամփորդների հետ։ Ես մայրիկիս հետ շրջում էի բազմաթիվ խանութներով՝ առանց ոչինչ գնելու, մենք պտտվում էինք, վայելում տեղական ուտեստներն ու քաղաքը։ Երեկոյան լողում էինք լճում եւ պարզապես հիանում փայլփլող ջրով։ Մի անգամ վաղ առավոտյան որոշեցի առանց հեռախոսի գնալ լճափ։ Վերցրի գիրքս, գլխարկս ու սավանը՝ ափին հանգստանալու համար։ 2 ժամ հանգստանալուց հետո մտածում էի վերադառնալ յուրտ՝ նախաճաշելու, բայց մոռացել էի ճանապարհը :)

Սարսափելի սթրեսի մեջ էի, քայլում էի մեծ ափի երկայնքով՝ ծնողներիս գտնելու համար, բայց նրանք չկային։ Չէի հիշում փողոցի անունը կամ յուրտի համարը։ Բայց ես գտա ծնողներիս գտնելու լավագույն եղանակը։

Ոչ, ես նրանց ափին չէի սպասում, այլ մտա բոլոր յուրտերը եւ հարցրեցի՝ արդյոք այնտեղ են իմ քույրերն ու եղբայրները կամ ծնողները։ Վերջապես, 2 ժամ որոնումներից հետո, գտա նրանց իրենց հողաթափերով։ Եվ գիտե՞ք ինչ։ Հանդիպեցի մի խումբ փրկարարների, որոնք նույնպես ինձ էին փնտրում, քանի որ ընտանիքս կարծում էր, թե ես խեղդվել եմ։ Վերջում մայրիկիցս լավ «ապտակ» ստացա։

Գուցե սա ծիծաղելի հնչի, բայց իրականում ես ապրում էի մանկությանս լավագույն պահերը եւ, անկասկած, աշխարհի ամենաերջանիկ մարդն էի։

Ինչո՞ւ որոշեցի մասնակցել Work and Travel ծրագրին

Երբ սովորում էի տարրական դպրոցի 2-րդ դասարանում, բախտս բերեց՝ ունեի մի ուսուցչուհի, որը խելացի էր, շատ բարի եւ նուրբ երեխաների հանդեպ։ Ի դեպ, ուսուցչուհիս Ամերիկայից էր եւ ուներ հիանալի ամերիկյան շեշտադրում։ Նա մեզ սովորեցնում էր երգել այբուբենը՝ «A-B-C-D-E-F-G»... Ես երգում էի նրա հետ, նա մեզ սովորեցնում էր անգլերենի որոշ հիմնական բառեր, բայց ես ոչ մի բառ չէի հասկանում։ Պատկերացնո՞ւմ եք։ Ամերիկացի աղջիկ, որը խոսում է միայն անգլերեն եւ չի հասկանում ղազախերեն կամ ռուսերեն, եւ երեխաներ, որոնք չգիտեն նրա լեզուն, սարսափելի է։ Այնուամենայնիվ, ես զվարճանում էի եւ վայելում անգլերենի դասերը։

Հիշում եմ՝ երազում էի, թե ինչպես եմ սահուն անգլերեն խոսելու եւ սովորեցնելու ուրիշներին։ Արդյունքում ստացա IELTS-ի վկայականս, աշխատանքի անցա որպես անգլերենի ուսուցչուհի, եւ հիմա ունեմ շատ սիրելի ուսանողներ, դա այն է, ինչով ես տարված եմ։

Ավագ դպրոցում գտա բլոգեր Մարինա Մոգիլկոյի էջը եւ բացահայտեցի Սան Ֆրանցիսկո հիասքանչ քաղաքը, որը դարձավ իմ երազանքների քաղաքը։ Ամերիկայի 50 նահանգները երազանքի պես են եւ իմ ապագա ուղղությունը 2023 թվականի ամռան համար։ Անվերջ հնարավորություններ, ինքնավստահության զգացում, հավակնություններ եւ գործարար ոգի՝ սա է Ամերիկան։

Ես այդ երազանքը կրում եմ 7 տարի եւ հուսով եմ, որ Work and Travel ծրագրի միջոցով կհասնեմ Միացյալ Նահանգների հետ կապված իմ բոլոր նպատակներին։

Ինչպե՞ս կարող եմ օգնել երկրիս զարգանալ՝ մասնակցելով W&T ծրագրին

Բանն այն է, որ փոխանակման ծրագրի ուսանողները մեծ ազդեցություն են ունենում տեղի ուսանողների վրա։ Կարծում եմ՝ այս պնդումը բավականին հասկանալի է կրթված մարդկանց համար, քանի որ նրանք գիտեն բազմազանության կարեւորությունը։ Ունենալ մի հասարակություն, որտեղ բոլոր ուսանողները մոտիվացված են հաջողության հասնելու, ճամփորդելու աշխարհով մեկ, բացահայտելու նոր տարածքներ, ջանասիրաբար սովորելու եւ խելացի աշխատելու, լավագույն բանն է Ղազախստանում։ Մեր երկիրը տարեցտարի զարգանում է, ուստի հմուտ, բազմակողմանի եւ նվիրված ուսանողները հիմնական միջոցն են, որոնցով ղազախական համալսարանները հասնում են իրենց կազմակերպչական նպատակներին։ Ես նկատի ունեմ, որ կենսական նշանակություն ունի հասկանալը, թե որքան կարեւոր է մեր ապագա կրթական համակարգի համար փոխանակման ծրագրի փորձ ունեցող ուսանողներ ունենալը եւ մեր ապագա առաջնորդների համար ճիշտ մտածելակերպ ձեւավորելը։

Ինչպե՞ս Work and Travel ծրագիրը կօգնի իմ ապագա կարիերային

Անկեղծ ասած, այսօր կրթություն փնտրող մարդիկ ցանկանում են սովորել պրոֆեսիոնալ ուսուցիչներից, որոնք ունեն համապատասխան փորձ եւ գիտելիքներ իրենց ոլորտներում։ Որպես ապագա ուսուցիչ՝ ես կցանկանայի գնալ ԱՄՆ՝ աշխատելու, այդ երկրում ապրելու փորձ ձեռք բերելու, մշակույթս փոխանակելու եւ, իհարկե, անգլերենս բարելավելու համար։ Ես շատ եմ սիրում ամերիկյան շեշտադրումը եւ սիրում եմ ամերիկացիներին, նաեւ ունեմ բլոգ Instagram-ում, որտեղ անվճար անգլերեն եմ դասավանդում, եւ կցանկանայի բլոգիս համար բովանդակություն ստեղծել աշխարհի տարբեր մասերից։ Դա հենց կարիերայիս աճի լավագույն մասը կլինի։

Ինչպիսի՞ն կլինեն փոխանակման ծրագրերը ապագայում։ Իմ ենթադրությունները։

Ես գուշակ չեմ, բայց վստահ եմ, որ ապագայում փոխանակման ծրագրերը լինելու են չափազանց հայտնի, մատչելի եւ օգտակար մեր Երկիր մոլորակի յուրաքանչյուր մարդու համար։ Այնպես որ, մենք բոլորս պետք է անենք հնարավորը, որ դա շուտափույթ իրականություն դառնա։ Քանի որ կասկած չունեմ, որ սա արժանի է դրան։

Շնորհակալություն ուշադրության համար, հուսով եմ՝ հավանեցիք այս էսսեն։

Լավագույն մաղթանքներով՝ Ալուա Աբդրալիեւա։