Սան Ֆրանցիսկո՝ ծիածանի բոլոր գույները!!!
Սան Ֆրանցիսկոն իդեալական վայր է LGBTQ+ համայնքի ներկայացուցիչների համար։ Եթե քաղաքի հետ ծանոթությունը սկսեք նրա ամենաբարձր կետից՝ Թվին Փիքսից (Twin Peaks), ապա այնտեղից արդեն կնկատեք ծիածանի գույներով բազմաթիվ դրոշակներ։ Այդպիսի դրոշակները զարդարում են քաղաքի մի ամբողջ թաղամաս՝ Կաստրոն (Castro), որը խիտ բնակեցված է այն մարդկանցով, ովքեր չեն ցանկանում թաքցնել իրենց սեռական նախասիրությունները։ Որպես կանոն, այս մարդիկ շատ ունեւոր են, մեծ ժամանակ են հատկացնում իրենց եւ իրենց կարիերային, ուստի այս անսովոր թաղամասը աննախադեպ տեմպերով ընդլայնվում է, եւ տպավորություն է ստեղծվում, որ շուտով ամբողջ քաղաքը կկլանվի վառ դրոշակներով եւ միասեռ զույգերով։ Ընդ որում, քիչ առաջ Սան Ֆրանցիսկոն համարվում էր հիպիների քաղաք։ Իսկ այժմ այդ անցյալից հիմնականում մնացել են միայն պացիֆիստական նշաններով բազմաթիվ հուշանվերներ եւ նմանատիպ այլ բաներ։
Սան Ֆրանցիսկոյում շատ են անօթեւանները, որոնք քնում են հենց փողոցում եւ մուրացկանություն անում մեքենաների վարորդներից։ Անօթեւաններն իրենք չեն թաքցնում, որ նման կյանքի են հասել ոչ թե ճակատագրի դաժանության, այլ իրենց սեփական ցանկությամբ։ Ցանկացած պահի նրանք կարող են ճիշտ ուղու վրա կանգնել, իշխանությունները կօգնեն նրանց աշխատանքով եւ անհրաժեշտ ամեն ինչով։ Բայց յուրաքանչյուրն իրավունք ունի ինքն ընտրելու իր կյանքի ուղին։
Ի տարբերություն շատ այլ ամերիկյան քաղաքների՝ Սան Ֆրանցիսկոն «մոխրագույն եւ քառակուսի» չէ, այլ գունավոր՝ կոկիկ տնակներով, բազմաթիվ ծաղիկներով եւ բլուրներով, որոնցով երթեւեկում են հայտնի կարմիր տրամվայները։ Այս ամբողջ հմայքից բացի՝ Սան Ֆրանցիսկոյում կան շատ հետաքրքիր վայրեր, որոնք հաստատ թույլ չեն տա ձանձրանալ՝ 39-րդ նավամատույցի (Pier 39) ակվարիումը, Fisherman’s Wharf-ը՝ ծույլ ծովառյուծներով, Californian Academy of Science-ը՝ ակվարիումների, տիեզերքի, հազվագյուտ կենդանիների, բույսերի եւ այլնի սիրահարների համար, բազմաթիվ թանգարաններ, որոնք իսկապես հետաքրքիր կլինի այցելել նույնիսկ նրանց, ովքեր դրանով չեն հետաքրքրվում։ Այն վայրերի սիրահարները, որոնցից «մաշկի վրայով սարսուռ է անցնում», կարող են այցելել հայտնի Alcatraz-ը՝ ամենավտանգավոր հանցագործների համար նախկին բանտը, որը գտնվում է Սան Ֆրանցիսկոյի ափից երեւացող առանձին կղզու վրա։ Ռեստորանային բիզնեսով իր բոլոր դրսեւորումներով հետաքրքրվող անձանց համար պարզապես անհրաժեշտ է այցելել «Rainforest Cafe» ռեստորանը, որը ձեւավորված է որպես իսկական ջունգլի՝ անհանգիստ վայրի կենդանիներով (ֆանտաստիկայի ժանրից մի բան), եւ հայտնի շոկոլադի ֆաբրիկայի «Ghirardelli» սրճարանը։ Իսկ քաղաքի գեղեցկությունը պսակում են 2 հսկայական կամուրջներ՝ Golden Gate Bridge-ը եւ Bay Bridge-ը։ Գիշերը բազմաթիվ ոսկեգույն լույսերով լուսավորությունը այս կամուրջները վերածում է քաղաքի իսկական թագի։
