Վաշինգտոն ԿՇ-ն Ամերիկայի մայրաքաղաքն է: Սա թերեւս միակ քաղաքն է, որտեղ ես կմնայի ապրելու: Այնտեղ կա ամեն ինչ՝ եւ՛ բարձրահարկ շենքեր, եւ՛ հսկայական քանակությամբ այգիներ, որոնցում զբոսնելիս չես զգում մեծ քաղաքների շենքերի ճնշումն ու արագ ռիթմը: Այստեղ շատ կանաչապատ տարածքներ կան, որոնք պակասում են շատ քաղաքների: Այս քաղաքը համատեղում է բացարձակապես ամեն ինչ: Կենտրոնը շատ գեղեցիկ է, այնտեղ կան բազմաթիվ հետաքրքիր շատրվաններ: Ինձ շատ դուր եկավ Կապիտոլիումը: Սպիտակ տունը մի փոքր հիասթափեցրեց, ես այն այլ կերպ էի պատկերացնում, կարծում էի՝ ավելի մեծ է, եւ ակնկալում էի ավելի մոտիկից տեսնել, իսկ այնտեղ մտնելու համար պետք է 6 ամիս հերթ սպասել: Միգուցե մի օր կհաջողվի: Վաշինգտոնն ունի հսկայական քանակությամբ հետաքրքիր անվճար թանգարաններ եւ մեծ կենդանաբանական այգի. այս այգում լինելուց հետո կարծում եմ՝ այլ քաղաքների կենդանաբանական այգիներ այլեւս պետք չէ այցելել, քանի որ այստեղ կա ամեն ինչ՝ սկսած ամենափոքր միջատներից ու կենդանիներից մինչեւ ամենախոշորները:
