Ցավոք, մեր քաղաքում ավտոբուսներ չկան, եւ մոտակա մեծ խանութներ ունեցող քաղաք հասնելու միակ միջոցը մեքենա ունեցող մարդ գտնելն է, նրա եւ ձեր ազատ ժամանակը համադրելը, եւ միայն այդ դեպքում կարող եք գնալ գնումների։ Ինձ մոտ դա հաջողվել է ընդամենը մի քանի անգամ, թե երբ կլինի հաջորդը՝ չգիտեմ։ Շատ լավ քաղաք է, մեծ Walmart խանութով, գտնվում է 60 կմ հեռավորության վրա, իսկ փոքրիկ խանութներով Damariscotta քաղաքը մեր տնից ընդամենը 20 կմ հեռավորության վրա է։
Մի անգամ, հանգստյան օրը, անելիք չունենալուց որոշեցի հեծանիվով գնալ այդ քաղաք։ Այնտեղ տանող ճանապարհը հեշտ չթվաց, բայց ոչ էլ այնքան դժվար, մի քանի կանգառով հասա նպատակակետին եւ սկսեցի թափառել խանութներով՝ հետաքրքիր իրեր փնտրելով։ Այդպես հաջողվեց զբոսնել այդ քաղաքով եւ մի քանի լուսանկար անել։
Այս զբոսանքից հետո ինձ սպասվում էր եւս 20 կմ մինչեւ տուն։ Ահա սա արդեն շատ ավելի դժվար էր։ Տուն հասնելով՝ պառկեցի անկողնում եւ ամբողջ երեկո ֆիլմեր դիտեցի, քանի որ այլ բան անելու ուժ չէր մնացել =))
