Ռուսաստանում ապրած 20 տարիների ընթացքում ես ԵՐԲԵՔ օրենքի հետ խնդիրներ չեմ ունեցել: Ամերիկայում ապրելուց մեկ ամիս անց ոստիկանությունն արդեն իմ լուսանկարն էր անում (mugshot):

Ամեն ինչ սկսվեց լրացուցիչ գումար վաստակելու միանգամայն անմեղ ցանկությունից: Ինչպես արդեն ասացի, մենք տեղափոխվեցինք ապրելու մի ռուս տղայի մոտ: Նա իմացավ, որ մենք աշխատանքի հետ կապված խնդիրներ ունենք եւ օգնություն առաջարկեց՝ ասելով, որ իր ծանոթը հենց նոր մարդիկ է փնտրում ռեստորանային բիզնեսի հետ կապված ինչ-որ բանի համար: Մենք երկար չմտածեցինք եւ համաձայնեցինք:

Աշխատանքը կայանում էր պիցցերիայի թռուցիկներ տարածելու մեջ: Ամեն ինչ այսպես էր. քեզ նստեցնում են մեքենան եւ տանում հյուրանոց: Այնտեղ դու պետք է անցնես անվտանգության աշխատակիցների կողքով՝ կասկած չհարուցելով: Հետո քո խնդիրն է շրջել հյուրանոցի բոլոր համարներով եւ յուրաքանչյուր դռան տակ թռուցիկ դնել: Լրիվ անմեղ աշխատանք է, չէ՞:

Առաջին 4 ժամվա ընթացքում մի քանի հյուրանոցներում հաջողվեց պարզապես անցնել անվտանգության աշխատակիցների կողքով՝ առանց հարցերի: Մյուսներում անմիջապես կանգնեցնում էին՝ ասելով. «No, guys. Get out!»: Մի քանի անգամ ստիպված եղանք ցանկապատի վրայով անցնել եւ օգտվել հետեւի մուտքից:

Եվ ահա մենք մոտեցանք Universal Studios-ի հյուրանոցներին: Հաջողությամբ անցանք առաջին 3 հարկերը եւ բարձրացանք 4-րդ հարկ: Այնտեղ մենք բաժանվեցինք, ես գնացի ձախ, Դիման՝ ուղիղ: Պայմանավորվեցինք կես ժամից հանդիպել հոլում: Ավարտելով 4-րդ հարկը՝ ես որոշեցի իջնել վթարային աստիճաններով, ոչ թե վերելակով: Բացում եմ դուռը, իսկ այնտեղ պահակ է կանգնած եւ կասկածանքով նայում է ինձ: Երկխոսությունը մոտավորապես այսպիսին էր.

• Կանգ առ, ո՞ր սենյակն է:
• Էմմ... (այստեղ նա տեսնում է թռուցիկները ձեռքիս)
• Օ, պիցցայի թռուցիկնե՞ր: Գիտե՞ս, որ սա անօրինական գործունեություն է: Հետեւիր ինձ:

Ճանապարհին պահակը լիովին անտարբեր դեմքով հետաքրքրվում էր իմ կյանքով, թե ով եմ, որտեղից եմ, ինչ հոբբիներ ունեմ եւ այլն: Իմ հարցին՝ «Իսկ ի՞նչ ենք սպասում: Դուք ինձ բաց կթողնե՞ք», նա ավելի անտարբեր դեմքով պատասխանեց. «Ոչ, հիմա ոստիկանությունը կգա եւ քեզ կտանեն=)»:

Դասական... Ոստիկանությունը հաստատ իմ պլանների մեջ չէր մտնում:

Ի վերջո, ամեն ինչ լավ ավարտվեց. իմ փաստաթղթերի պատճենները հանեցին, մի քանի լուսանկար արեցին եւ բաց թողեցին՝ ասելով. «Եթե էլի այստեղ հայտնվես, կձերբակալենք»:

Բարոյախոսություն. վստահիր, բայց ստուգիր: Հատկապես, եթե գործ ունես ռուսների հետ: