Ժամանելուս առաջին իսկ օրերին Օլյան ինձ մի կույտ պայմանագրեր տվեց, որոնց թվում՝ բնակարանի վարձակալության պայմանագիր։ Բանն այն է, որ մեր գործատուն անշարժ գույքի գործակալությունից բնակարան էր վարձել իր աշխատակիցների համար, մեզանից յուրաքանչյուրը վճարում էր 450 դոլար երեքտեղանոց սենյակում մեկ տեղի համար, եւ մենք նաեւ 450 դոլար ավանդ (դեպոզիտ) էինք մուծել։ Պայմանագրի կանոնները սահմանում էին, որ ավանդը կվերադարձվի, եթե պահպանվեն հետեւյալ պայմանները.

• բնակարանում ոչինչ կոտրված կամ վնասված չէ, բնակարանը կատարյալ մաքրված է։

• մենք հյուր չենք բերել այնպիսի մարդկանց, որոնք մեր շեֆի վարձու աշխատողները չեն (երբ ստորագրում էի, այս կետն ինձ անմիջապես վրդովեցրեց, բայց այլ ելք չկար)։

• մենք բնակարանը չենք լքում մինչեւ այն ամսաթիվը, մինչեւ որը ստորագրել ենք պայմանագիրը։

Որո՞նք էին իմ սխալները։ Ես, միամտորեն կարծելով, որ չեմ ցանկանա լքել այսպիսի հիանալի վայր, ստորագրեցի վարձակալության պայմանագիր մինչեւ սեպտեմբերի 1-ը։ Իսկ այնտեղ դիմացա ընդամենը մեկ ամիս։ Եվ գուշակեք, թե ինչ եղավ իմ ավանդի հետ։ Ճիշտ է, ոչ ոք այն ինձ չվերադարձրեց։ Ամեն ինչ ինքս եմ ստորագրել, ամեն ինչ արդար է։

Մի ընկեք նման թակարդի մեջ։ Ստորագրեք վարձակալության պայմանագիրը, եթե այդպիսին կա, ամենակարճ ժամկետներով, այն հետո երկարացնելը բոլորովին դժվար չէ։ Եթե դուք տեղափոխվեք բնակարան եւ չլեզվագտնեք անկարգապահ հարեւանների հետ, հնարավոր է, որ արդեն մեկ շաբաթից կցանկանաք տեղափոխվել, բայց ափսոս կլինի կորցնել ավանդը։ Ձեզ դա պե՞տք է։ Կարծում եմ՝ ոչ։

Ի դեպ, իմ հարեւանուհիներ Կատյան եւ Ալինան իրենց ավանդը չստացան մեկ այլ պատճառով՝ նրանց մեկնելուց քիչ առաջ լվացքի մեքենան փչացավ։ Նրանց ավանդներից այնուամենայնիվ պահեցին 150 դոլար, թեեւ չպետք է պահեին։

Հիշեք։ Եթե առարկաների վրա չկան արտաքին վնասվածքներ (damage), ապա ձեր տանտերը (land lord) վերանորոգում է առարկաները սեփական միջոցներով։ Տեխնիկան փչանալու հատկություն ունի, եւ ոչ միշտ՝ ձեր մեղքով։ Եթե դուք հեռուստացույցի էկրանը բռունցքով կոտրել եք՝ դա մեկ բան է, իսկ եթե ներսում ինչ-որ բան այրվել է անհասկանալի պատճառով՝ դա այլ բան է, ինչո՞ւ պետք է դուք վճարեք դրա համար։ Այնպես որ, այս մարդիկ օգտվեցին աղջիկների՝ իրենց իրավունքների մասին չիմանալուց։