...Թեեւ եղանակը զարմանալիորեն արեւոտ եւ տաք էր ամբողջ շաբաթվա ընթացքում, որն անցկացրեցի Լոնդոնում։

Լոնդոնում զբոսնելը հատուկ հաճույք է։

Թաուեր կամուրջը Լոնդոնի ամենահայտնի կամուրջն է, որը քաղաքի խորհրդանիշներից մեկն է։

Թաուեր կամուրջը Լոնդոնի մյուս բոլոր կամուրջներից եւ ընդհանրապես Թեմզայի վրայի բոլոր կամուրջներից տարբերվում է հետեւյալով. այն Թեմզայի հոսանքի ամենացածր կամուրջն է եւ միակը, որը բացվող է։ Կամուրջն իր անունը ստացել է Թաուերի հարեւանության շնորհիվ. կամրջի հյուսիսային ծայրը գտնվում է Թաուերի հարավ-արեւելյան անկյան մոտ։

Լոնդոնի ամենաբարձր կետում է գտնվում Սուրբ Պողոսի տաճարը (Սենթ Փոլ): Եվրոպայի այս խոշորագույն անգլիկան եկեղեցին Լոնդոնի եպիսկոպոսի նստավայրն է։ Տաճարի գմբեթը դարձել է Լոնդոնի գլխավոր տեսարժան վայրերից մեկը։ Ավանդաբար Սենթ Փոլը Մեծ Բրիտանիայի ամենահայտնի քաղաքացիների հանգստավայրն է, որոնց թվում է նաեւ այս տաճարը կառուցած ճարտարապետ Քրիստոֆեր Ռենը։ Նրա գերեզմանին հուշարձան չկա, միայն տապանաքարի վրա կա գրություն. «Ընթերցող, եթե փնտրում ես հուշարձան, պարզապես նայիր շուրջդ»։

Թագավորական արմատներ կարելի է եւ չունենալ, բայց շքեղ պալատը միշտ էլ ցանկանում ես տեսնել։ Հատկապես, եթե դա Լոնդոնի Բուքինգհեմյան պալատն է։

Պալատը եզակի է ոչ միայն իր վեհությամբ, այլեւ նրանով, որ այստեղ անցկացվում են թագավորական ընտանիքի պաշտոնական արարողություններն ու միջոցառումները, եւ այստեղ են գալիս զբոսաշրջիկները էքսկուրսիաների։ Ճիշտ է, մուտքը հանրության համար գրեթե միշտ փակ է։

Լոնդոնում շատ թանգարաններ կան՝ Բրիտանական թանգարանը, Վեստմինստերյան աբբայության թանգարանը, Վիկտորիայի եւ Ալբերտի թանգարանը, Լոնդոնի բնական պատմության թանգարանը, Շերլոկ Հոլմսի թանգարանը։ Մուտքը գրեթե ամենուր անվճար է։

Ըստ Արթուր Կոնան Դոյլի ստեղծագործությունների՝ Շերլոկ Հոլմսը եւ նրա ընկեր դոկտոր Վաթսոնը 1881-1904 թվականներին ապրել են Բեյքեր սթրիթ 221b հասցեում գտնվող բնակարանում։ Այս ստեղծագործությունները գրելու ժամանակ Լոնդոնում նման հասցե գոյություն չուներ։ Բայց ավելի ուշ, Բեյքեր սթրիթը դեպի հյուսիս երկարացնելիս, հայտնվեց այդ հասցեով տուն, որտեղ ներկայումս գտնվում է Շերլոկ Հոլմսի թանգարանը։

Մեկ շաբաթ Լոնդոնում ապրելով՝ ես այդպես էլ չկարողացա տեսնել այս քաղաքի բոլոր տեսարժան վայրերը։ Չափազանց շատ թանգարաններ, չափազանց շատ վայրեր, ուր ցանկանում ես գնալ, չափազանց քիչ ժամանակ։

Բայց սրանով իմ ճանապարհորդությունը չավարտվեց։ Առջեւում Լիվերպուլն է, Բլեքբերնը, Չեսթերը եւ Մանչեսթերը։