Լեզվի դպրոցի դասընթացն ավարտելուց հետո որոշեցի մի փոքր ճանապարհորդել եւ տեսնել Շեքսպիրի ու Հարի Փոթերի հայրենիքը։
Առաջին կանգառս Լանկաշիրի Բլեքբերնն էր։ Այնտեղ հասնելով՝ ոչ մի հետաքրքիր բան չգտա... Ընդհանրապես ոչինչ։ :)
Մտքիս եկավ հայտնի «Yellow Submarine» մուլտֆիլմի տեսարանը։ Հայտնվելով ոչ մի տեղ, մի վայրում, որտեղ անցքեր կային, Ջոն Լենոնն ասաց. «Սա ինձ հիշեցնում է Լանկաշիրի Բլեքբերն անունով մի վայր»։ Նա ճիշտ էր։
Նրանց մասին խոսելիս...
Լեգենդար The Beatles խմբի երկրպագուները պարտադիր պետք է այցելեն Լիվերպուլ՝ The Beatles Story թանգարան։ Այնտեղ կարելի է թմբուկ նվագել Ռինգո Սթարի հետ եւ զբոսնել հենց այդ դեղին սուզանավի մեջ։ :)
Լիվերպուլը նավահանգիստ է Անգլիայի հյուսիս-արեւմտյան ափին՝ Մերսի գետի գետաբերանում։ Գեղեցիկ քաղաք է։
Հաջորդը Չեշիրի Չեսթերն էր։ Չեսթերի պատմությունը սկսվում է մոտ երկու հազար տարի առաջ՝ Բրիտանիայի հռոմեական օկուպացիայի ժամանակաշրջանում։ Չեսթերը շատ գեղեցիկ, պատմական քաղաք է։ Այն շրջապատված է Պարսպով, որը հռոմեացիները կառուցել են շատ դարեր առաջ։ Իսկ այդ Պարիսպները քաղաքի բնակիչների համար այժմ զբոսանքի ուղիներ են։ Չեսթերում շատ տեսարժան վայրեր կան՝ Չեսթերի տաճարը, Պարիսպները, բայց ինձ ամենաշատը տպավորեց կենտրոնական փողոցը։ Այստեղ զգացվում է հին Անգլիան։
Ինձ հաջողվեց այցելել 13-րդ դարում կառուցված Stokesay Castle։ Այս ամրոցով զբոսնելիս շատ հեշտ է պատկերացնել միջնադարյան Անգլիայի կյանքն ու կենցաղը։ Հեքիաթային վայր է։
