Մեր ճանապարհորդությունը սկսեցինք սեպտեմբերի 8-ին մեքենայով, ղեկին մեր ընդհանուր ընկեր Անդրեն էր, ում հետ ծանոթացել էինք Էստես Պարկում։ Մեքենայով ճանապարհորդելն ունի հսկայական առավելություններ՝ ոչ միայն նյութական խնայողության, այլեւ հոգեւոր առումով. այն մտերմացնում է մեզ բոլորիս եւ ավելի ամրապնդում մեր ընկերությունը։ ԿԱՏԱՐՅԱԼ ճանապարհներով դեպի Լաս Վեգաս տանող ուղին տեւեց ավելի քան 12 ժամ՝ անցնելով Յուտա եւ Արիզոնա նահանգներով։
Գիշերվա ժամը 3-ն է, առջեւում փայլփլում են Վեգասի լույսերը, նույնիսկ գիշերը շատ շոգ էր։ Մենք կանգ առանք Flamingo հյուրանոցում, մեր զարմանքին՝ շքեղ լյուքս համարը շատ էժան էր՝ ընդամենը 40 դոլար մեկ գիշերվա համար։ Հյուրանոցային բիզնեսը պարզապես ծաղկում է օրեցօր։ Լաս Վեգասն ինձ ավելի շատ զարմացրեց իր գաղափարով, քան մյուս բոլոր քաղաքները։ Քայլելով մեղքերի քաղաքում՝ դու հեշտությամբ կարող ես հայտնվել Լոնդոնում, Նյու Յորքում, Փարիզում, Դիսնեյլենդում, Եգիպտոսում, Հունաստանում եւ Հռոմում։ Սա պարզապես անհավանական քաղաքային կառույց է, որը գրավում է միլիոնավոր զբոսաշրջիկների ամբողջ աշխարհից։ Խաղատները առանձին թեմա են։ Խաղատներ կան ամենուր, չեմ թաքցնի, չնայած այն պահին ես անչափահաս էի, փորձեցի բախտս՝ մի քանի անգամ խաղալով ավտոմատներով։ Արդյունքը՝ ես ամեն ինչ տանուլ տվեցի եւ բացահայտեցի իմ բնավորության նոր գիծը՝ «մոլեխաղամոլությունը»։ Փող կորցնելը կարող էր շարունակվել այնքան ժամանակ, քանի դեռ անվտանգության աշխատակիցները չէին վտարել ինձ՝ ստուգելով անձնագիրս։ Այս իրավիճակն ինձ ամենեւին չվշտացրեց, քանի որ այդ գիշեր մեզ սպասում էր հենց ինքը՝ միսս Բրիթնի Սփիրսի համերգ-շոուն։ Փոփ երաժշտության արքայադուստրը արդեն երկու տարի է՝ իր ռեզիդենցիան է վարում Վեգասում, եւ նրա ելույթները համարվում են տարվա ամենաեկամտաբեր եւ լավագույն շոուները։ Շոուն անցավ ամենաբարձր մակարդակով, հույզերի փոթորիկը համակել էր ինձ, քանի որ մինչ այդ կյանքումս երբեք չէի տեսել նման մասշտաբի ելույթներ, եւ այն փաստը, որ ես տեսա իրական աստղին այնքան մոտիկից, որ կարող էի մանրամասն դիտել նրան, արդեն իսկ հսկայական եւ մեծ պլյուս էր։
Այնտեղ անցկացրած 2 օրվա ընթացքում հասկացա, որ ամբողջությամբ եւ լիովին սիրահարված եմ այս քաղաքին։
Լաս Վեգասը լիակատար ազատություն է, գիշերային զբոսանքներ, շքեղ հյուրանոցներ, զվարճանքի կենտրոն, գեղեցիկ կյանք, գեղեցիկ մարդիկ, պոզիտիվի հրաբուխ եւ իմ բոլոր զարմանքների ու հոգեւոր հաճույքի էպիկենտրոնը։
