2015 թվականի ամառը երկար կմնա հիշողությանս մեջ, քանի որ այն լի էր իրադարձություններով եւ արկածներով։ Հիմա մտածելով այն մասին, թե ինչպես հայտնվեցի Ամերիկայում, իսկապես զարմանում եմ, որ ամեն ինչ այդքան անսովոր կերպով ստացվեց։ Նախկինում լսել էի այս ծրագրի մասին, բայց լրջորեն չէի մտածել այդ ուղեւորությունն իրականացնելու մասին։ Ես զբաղված էի արտերկրում ուսումով, անվերջ քննություններով եւ ակումբային տարբեր գործունեություններով։ Work and Travel USA ծրագրի մասին ավելի մանրամասն լսեցի մտերիմ ընկերուհուսից այն բանից հետո, երբ նա ամառն անցկացրեց Ամերիկայում։ Այս շարադրության մեջ ընկերուհուս կանվանեմ Կ.։ Նրա հույզերը հորդում էին, երբ նա պատմում էր իր արկածների մասին։ Նաեւ անհնար էր չնկատել, որ Կ.-ն փոխվել էր։ Նա դարձել էր ավելի բաց եւ ժպտերես, իսկ աշխարհայացքը մի փոքր փոխվել էր։ Ես երկար տարիների ընթացքում հասկացա, որ գուցե երբեք նրան այդքան ազատ եւ երջանիկ չէի տեսել։ Ես մի փոքր թերահավատորեն վերաբերվեցի Կ.-ի պատմածներին։ Նայելով նրան՝ հասկացա, որ նա ապրել եւ ընկերացել է հրաշալի մարդկանց հետ, որոնք հոգեհարազատ են եղել իրեն եւ կյանքի հանդեպ իր հայացքներին։ Բայց եւ այնպես, նրա պատմությունից հետո էլ ինձ մոտ ԱՄՆ մեկնելու ուժեղ ցանկություն չառաջացավ։ Մտքերս զբաղված էին առաջիկա Եվրոպա ուղեւորությամբ, եւ ես անհամբերությամբ սպասում էի դրան։ Հետեւաբար, մտովի տրամադրվել կամ այլ բան մտածել չէի ուզում։ Կ.-ի պատմություններից հասկացա, որ նա ուզում է վերադառնալ։ Ուզում է նորից շնչել այդ օդը եւ խորը շունչ քաշել։ Ցանկանում է նորից զգալ այն էյֆորիան, որի մեջ գտնվում էր։ Ես ուրախ էի ընկերուհուս համար, քանի որ Կ.-ն գտել էր մի վայր եւ մարդիկ, որոնց հետ երջանիկ է անցկացնում իր ժամանակը։ Եվ դա ամենեւին էլ այն պատճառով չէ, որ նա նրանց ավելի շատ է սիրում, քան իր ընտանիքին կամ ընկերներին։ Պարզապես Կ.-ն ուզում էր զգալ ազատությունը եւ նորից երեխա դառնալ։ Այս եզրակացություններին ես եկա, երբ ինքս այցելեցի ԱՄՆ։

Հանգամանքների բերումով ես որոշեցի մեկնել Ամերիկա։ Համենայն դեպս, փորձել։ Կ.-ն վստահ էր, որ ես խնդիրներ չեմ ունենա։ Իսկ ես պատրաստվել էի, որ եթե ԱՄՆ-ի «Ա» տարբերակը չստացվի, ապա պատրաստ կունենամ «Բ» եւ «Գ» տարբերակները։ Ես ընդհանրապես չէի անհանգստանում, ինձ համար դա կարեւոր բան չէր։ Ես համարեցի, որ ամեն դեպքում ամեն ինչ կդասավորվի այնպես, ինչպես ավելի լավ կլինի։