Ամառը թռավ-գնաց, եւ ժամանակն է տուն վերադառնալու։ Մի փոքր տխուր է, որ ամառային արձակուրդներս ավարտվեցին, բայց մյուս կողմից՝ կարոտ կա հարազատ տան եւ ընտանիքի հանդեպ։ Մաղթում եմ բոլորին զգալ հայրենիքի հանդեպ այդ նույն կարոտը։ Ամերիկան հրաշալի եւ հմայիչ երկիր է, բայց եւ այնպես՝ «East or West Home is The Best», հավատացեք, դա իսկապես այդպես է։ Ես շատ եմ կարոտում Ամերիկան եւ հույս ունեմ, որ հաջորդ տարի էլ կհայտնվեմ այնտեղ, բայց գիտեմ, որ միեւնույն է՝ վերադառնալու եմ տուն՝ իմ հարազատ հողին։ Զավեշտալին այն է, որ տուն վերադառնալուց հետո դուք նույնիսկ չեք հավատա, որ այդ ամենը հենց ձեզ հետ է պատահել, որ դուք երեք ամիս անցկացրել եք մեկ այլ աշխարհում։
Ամեն օրը եւ ամեն պահը, որ անցկացրել եք Նահանգներում, դուք հիշելու եք ժպիտով, հատկապես առաջին օրերը, երբ ընդհանրապես չէիք հասկանում, թե ինչ է կատարվում շուրջը :)
Եվ ես կարող եմ հաստատ ասել, որ դուք չեք վերադառնա նույն մարդը, ինչ եղել եք մեկնելուց առաջ։ Ամերիկան կփոխի ձեզ, դուք կդառնաք ավելի ինքնուրույն եւ մի փոքր ավելի հասուն։ Միգուցե նաեւ այն պատճառով, որ դուք երեք ամիս ապրելու եք մենակ՝ անծանոթ միջավայրում, կողքին չի լինի մայրիկը, որը կգուրգուրի եւ կփայփայի, չեն լինի ընկերներ, որոնք կհասկանան ձեզ կես խոսքից։ Բայց դրա շնորհիվ դուք աշխարհին կնայեք այլ աչքերով, կյանքի հանդեպ ձեր հայացքները կփոխվեն, եւ ընդհանրապես՝ դուք ինքներդ մի փոքր կփոխվեք։ Սա իսկապես հսկայական առավելություն է, սա իրական կյանքի փորձ է։ Գնահատեք տնից հեռու անցկացրած ամեն օրը եւ ամեն րոպեն, քանի որ տուն վերադառնալիս դուք միեւնույն է՝ ունենալու եք որոշակի ափսոսանքներ, լինելու են պահեր, որոնք կցանկանայիք փոխել։ Վայելեք ամեն օրը եւ երբեք մի բողոքեք։ Ուրախացեք։ Ամեն օր ձեզ համար բացահայտեք նոր բաներ։ Ծանոթացեք նոր մարդկանց հետ, եւ պարտադիր չէ, որ նրանք հենց ամերիկացիներ լինեն։ Որովհետեւ ձեր ամառը կթռչի ակնթարթում, եւ տուն վերադառնալուց հետո դուք շատ եք կարոտելու Նահանգները, ձեր ընկերներին, աշխատանքը եւ ձեր փոքրիկ քաղաքը, որը որոշ ժամանակ անց ձեզ համար կդառնա այդքան հարազատ եւ սովորական։
