Հնարավորություններ՝ երեկ, այսօր, վաղը։

Դժվար կլինի պատկերացնել մեր աշխարհը 20 տարի անց, քանի որ աշխարհում ամեն ինչ անկանխատեսելի է։ Սկզբի համար եկեք համեմատենք, թե ինչ էր 20 տարի առաջ եւ ինչ կա հիմա, այն ժամանակ ավելի հեշտ կլինի ասել, թե ինչ է մեզ սպասվում 2039 թվականին։

1999 թվական՝ կոճակավոր հեռախոսներ, հսկայական համակարգիչներ, նախնադարյան ինտերնետ, տետրիս, խանութներ գնալը, պոլիկլինիկաների հերթերը, թղթադրամներ եւ շատ ավելին։ Մեր օրերում ամեն ինչ շատ ավելի պարզ է դարձել։ Սենսորային սմարթֆոններ՝ բազմաթիվ խելացի գործառույթներով, տետրի հաստությամբ համակարգիչներ եւ նոութբուքեր, գերարագ ինտերնետ, առցանց գնումներ եւ էլեկտրոնային փողեր։

Վստահությամբ կարող եմ ասել, որ յուրաքանչյուր երկրորդ մարդը դիտել է 90-ականների ֆիլմեր, որտեղ մարդիկ կանխատեսում էին, որ ապագայում կլինեն թռչող մեքենաներ, լազերային ատրճանակներ եւ շատ ավելին՝ «Աստղային պատերազմների» ոճով։ Ֆիլմից նման սցենարն արդեն մոտ է։ Մենք, իհարկե, դեռ թռչող մեքենաներ չունենք, բայց բազմաթիվ տեխնոլոգիական առաջընթացներ արդեն տեղի են ունեցել։ Ժամանակին համընթաց քայլելով՝ մենք նույնիսկ չնկատեցինք, թե ինչպես հայտնվեցինք այս «ապագայում»։

Այսօր մենք նոր տեխնոլոգիաների միջոցով արագորեն հասնում ենք տարբեր գիտական բեկումների։ Օրինակ՝ դիտարկենք գաստրոնոմիայի ոլորտը։ «Վիլլի Վոնկան եւ շոկոլադի ֆաբրիկան» ֆիլմի տեսարանը, որտեղ Վայոլետը փորձեց երեք ուտեստից բաղկացած մաստակ-ճաշը։ Ի՞նչ կարող է դա նշանակել։ «Time»-ի համար գրված հոդվածում Google-ից Ռեյ Կուրցվեյլն ասում է. «Հաջորդ խոշոր պարենային հեղափոխությունը կլինի ուղղահայաց գյուղատնտեսությունը, որտեղ մենք սնունդը կաճեցնենք ուղղահայաց շենքերում, այլ ոչ թե հորիզոնական հողի վրա. հիդրոպոնիկ բույսեր մրգերի եւ բանջարեղենի համար եւ կլոնավորված միս փորձանոթում»։ Այս փոփոխություններն արդեն տեղի են ունենում։ Green Spirit Farms-ը Չիկագոյի մոտակայքում գտնվող պլաստմասսայի հին գործարանում LED լամպերի տակ կաղամբ, սպանախ եւ այլ կանաչեղեն է աճեցնում։

Ինչպե՞ս տեխնոլոգիական առաջընթացը կազդի Work and Travel ծրագրի վրա։ Ապագայում ես այս ծրագիրը տեսնում եմ գիտահետազոտական հունով։ Հնարավոր է, որ այս ծրագրի ամենակարեւոր նպատակներից մեկը լինի ուսանողների փոխանակումը՝ գիտելիքներ ձեռք բերելու համար, որոնք կնպաստեն մարդկության զարգացմանն ու աճին։ Չէ՞ որ մեր երկրում նույնպես կան շատ երիտասարդներ՝ մեծ ներուժով եւ պայծառ գաղափարներով։ Այս ծրագիրը նրանց հնարավորություն կտա բացահայտել իրենց եւ քայլ կատարել դեպի ապագա։ Եվ այն ժամանակ աշխարհում կավելանան մարդիկ, ովքեր չեն զիջի Բ. Գեյթսին եւ Ս. Ջոբսին։

Ինչի՞ համար է անհրաժեշտ ուսանողների նման փոխանակումը։ Բոլորին հայտնի փաստ է՝ ապագան նանոտեխնոլոգիաների եւ մարդկության այլ հայտնագործությունների հետեւում է։ Այսպիսով, ինչպե՞ս դրանք կազդեն մեր ապագայի վրա։

2039 թվականին ես ինձ տեսնում եմ որպես հաջողակ businesswoman նանոտեխնոլոգիաների ոլորտում։ Work and Travel ծրագրի շնորհիվ մեծ թվով ուսանողներ, ընդունելով իրենց այցելած երկրների փորձը, այն գործնականում կիրառում են մեր մեծ, համերաշխ ընկերությունում։

Մենք կարող ենք նանոտեխնոլոգիան սահմանել որպես մեթոդ, որը գործ ունի նանոմակարդակում նյութերի մանիպուլյացիայի հետ, որը ներկայացնում է 1-ից 100 նանոմետր տիրույթում շարժվող մասշտաբ։

Ձեզ, հավանաբար, այնքան էլ պարզ չէ, թե ինչ է դա նշանակում, այնպես որ, եկեք ավելի խորը դիտարկենք։ Քանի որ մեկ նանոմետրը հավասար է մետրի մեկ միլիարդերորդ մասին, մենք կարող էինք պարզեցնել սահմանումը եւ ասել, որ նանոտեխնոլոգիան տեխնիկա է, որը ձգտում է մանիպուլյացիայի ենթարկել մատերիան չափազանց փոքր չափերի մակարդակներում։

Մեր ընկերությունը երկար տարիների ընթացքում, ծրագրի նախկին ուսանող-մասնակիցների մասնակցությամբ, հասել է այնպիսի արդյունքների, ինչպիսիք են.

1. Բոլոր հիվանդությունների դեղամիջոց։ Նանոմակարդակում մատերիայի մանիպուլյացիան եւ մարդու մարմնի աշխատանքի մասին ընդարձակ գիտելիքները դարձան բոլոր հիվանդությունների դեղամիջոց եւ վերականգնեցին ժամանակի ազդեցությունը մարդու մարմնի վրա, նույնիսկ հասան մարդկային անմահության։ Ճիշտ այնպես, ինչպես տրանսպորտային միջոցի շարժիչը, որը կարելի է վերանորոգել, քանի որ մենք գիտենք, թե ինչպես է այն աշխատում եւ դրա մասերի չափը, որոնք հեշտ է մանիպուլյացիայի ենթարկել, առաջադեմ նանոտեխնոլոգիաները լրացնում են բժշկական գիտելիքները՝ մարդու մարմինը շատ հեշտությամբ մանեւրելու համար։ Ներկայումս կան բժշկական հետազոտություններ, որոնք օգտագործում են նանոռոբոտներ՝ քաղցկեղի դեմ պայքարելու համար։

2. Ցանկացած մտահղացվող օբյեկտի ստեղծում։ Ստեղծվել է ապարատ, որը կարող է ստեղծել այն ամենը, ինչի մասին կարող է երազել մեր երեւակայությունը։ Հարկավոր է միայն այն լիցքավորել որոշակի քանակությամբ նյութերով եւ սահմանել խնդիրը նանոչափային մասշտաբով։ Ստացված արդյունքը ստեղծում է այն ամենը, ինչ մենք ցանկանում ենք, ներառյալ օրգանական նյութը։

3. Աղտոտվածության վերջը։ Դուք, հավանաբար, գիտեք, թե ինչի մասին ենք խոսում։ Շրջակա միջավայրը մաքրելու համար նախատեսված նանոռոբոտների բանակը վերացնում է աղտոտվածությունը՝ վերջապես հասնելով աղտոտվածությունից զերծ մաքուր մոլորակի այս տեսլականին։

4. Մուտք դեպի նոր հնարավորություններ եւ նոր աշխարհներ։ Լավ զարգացած նանոտեխնոլոգիան թույլ է տվել մարդկանց ընդլայնել իրենց հնարավորությունները երեւակայությունից դուրս։ Մեր ուղեղի մեջ տեղադրված նանոռոբոտները մեծացրել են մեր հիշողությունը եւ մեր ինտելեկտը, մեր նյարդային համակարգը ուղղակիորեն միացրել են ցանցին՝ մեզ տալով անհապաղ մուտք դեպի բոլոր տեսակի գիտելիքներ։ Նրանք մեզ հնարավորություն են տվել զգալ, որ մենք իրական աշխարհից անտարբերելի վիրտուալ աշխարհների մաս ենք կազմում։

Ինչպիսին էլ լինեն նանոտեխնոլոգիաները, մեկ բան պարզ է. դրանք հավերժ փոխեցին մարդկության պատմությունը։