Ինչպե՞ս առանց արկածների, երկար սպասել պետք չեկավ։

Մի անգամ ցանկացա բուրգեր ուտել։ Դուրս եկա, սակայն ինտերնետի սակագինս ավարտվեց, արդյունքում մնացի առանց օնլայն քարտեզի եւ մոլորվեցի։ Իսկ McDonald's-ը բավականին հեռու էր, այստեղ զբոսանքի համար ճանապարհ չկա, միայն ավտոմայրուղի, բայց դա ինձ չկանգնեցրեց։ Քայլեցի երկու ժամ, ոչ տներ, ոչ շենքեր, հաստատ մոլորվել էի։ Անելու բան չկար, պարզապես քայլում էի ու լաց լինում, լաց լինում ու քայլում։ Մի մեքենա կանգնեց, ղեկին մի կին էր։ Չգիտեմ, թե էլ ինչ իրավիճակում կհայտնվեի, եթե ոչ նա։ Արդյունքում նա ինձ տարավ McDonald's։ Բայց պարզվեց, որ ես հայտնվել եմ հարեւան քաղաքում։ Իսկ թե որ մեկն է պետք, չէի կարողանում բացատրել՝ հեռախոսս անջատվեց։ Գնացինք նրա ամուսնու տուն։ Մտա նրանց տուն եւ շեմին ինձ դիմավորեց մի շուն՝ խաղալիքը բերանին։ Ուղիղ այնպիսին, ինչպիսին ամերիկյան ֆիլմերում է։ Ինչպիսի՜ լավ մարդկանց հանդիպեցի։ Նրանք որոշեցին ինձ տուն հասցնել, նստեցինք մեքենան ու ճանապարհ ընկանք։ Գնալիս անցնում էինք այդ անիծյալ McDonald's-ի կողքով։ Կանգնեցինք ուտելու։ Ուտելիս սկսեցինք քննարկել երկրները, մեր խոսակցությունը լսելով՝ մոտեցավ 75-80 տարեկան մի տատիկ, միացավ մեզ, եւ պարզվեց, որ նա եղել է ավելի քան 100 երկրում, սպասում է դստերը, որը Սթենֆորդն ավարտելով՝ գալիս է իր մոտ։ Կերանք, հրաժեշտ տվեցինք։ Երեքով շարունակեցինք զբոսնել, մտանք սուպերմարկետ գնումներ անելու։ Ինձ համար շատ մակարոն վերցրեցի, նվազագույն իրեր, միայն ամենաանհրաժեշտը։ Հանդիպում եմ նրանց ելքի մոտ, իսկ նրանք ինձ են մեկնում տարբեր քաղցրավենիքներով լի փաթեթ, ԱՄԲՈՂՋ ՓԱԹԵԹ։ Արագ հետ վազեցի ու բացիկներ գնեցի, որպեսզի գոնե փոքրիկ հիշողություն մնա։ Մտածում էի՝ սրանով ամեն ինչ ավարտվեց, հանգիստ կհասնեմ տուն։ Բայց ոչ։ Այդ կինը ճանապարհին տեսավ պաղպաղակի կրպակ եւ այնպես բացականչեց՝ «Honey, i want ice creaaaaammmm», որ ամուսինը կտրուկ արգելակեց, եւ մենք ստիպված եղանք նրա հետ գնալ պաղպաղակի։

Ամբողջ ճանապարհին զրուցում էինք, երբեք չէի հանդիպել այսքան բարյացակամ եւ բաց մարդկանց, հիմա գիտեմ, որ նման մարդիկ գոյություն ունեն, եւ կփորձեմ լինել նրանց շարքերում։ Իսկ երբ բացիկները հանձնեցի, նրանք այնքան ուրախացան, կարծես ես էի նրանց քաղցրավենիքի մի ամբողջ փաթեթ նվիրել, այլ ոչ թե նրանք՝ ինձ։ Ահա այսպիսի օր։ Հաստատ հայտնվեցի ամերիկյան ֆիլմում։ Չէի մտածում, որ երբեւէ այսքան կբախտավորվեմ լավ մարդկանց հարցում։ Փոխանակվեցինք համարներով, գրկախառնվեցինք եւ համբուրվեցինք։ Շնորհակալ եմ այս անմոռանալի փորձի համար։