Կարծում եմ՝ 2019-ի ամառը հավերժ կմնա իմ սրտում։ Այդքան կարճ ժամանակահատվածում այն ինձ նվիրեց ընկերներ ավելի քան 15 երկրներից։ Հիմա ես ունեմ ընկերներ Իսպանիայից, Հորդանանից, Թայվանից, Ռուսաստանից, Սլովակիայից, Լատվիայից եւ այլն։ Ամառն ավարտվեց, բայց մեր շփումը՝ ոչ։ Դրա ապացույցն են մեր մշտական չաթերը, իսկ նրանցից մեկին ես նույնիսկ հյուրընկալվել եմ։ Թաիլանդից մի տղա ինձ ծանոթացրեց իր մշակույթին, հյուրասիրեց համեղ, ավանդական ուտեստներ։ Եվ այդպես ես հասկացա, որ Work and Travel USA ծրագիրն ինձ համար նույնիսկ ոչ թե աշխատանքի ու ճամփորդության, այլ մարդկանց ու հաղորդակցության մասին է։ Այս ծանոթությունների եւ ընկերության շնորհիվ իմ շրջապատն ընդլայնվեց, իմ այցելելու երկրների ցանկում հայտնվեցին ոչ միայն երկրները, այլեւ կոնկրետ քաղաքներ, որտեղ ապրում են իմ ընկերները։ Երբ նախկինում կարծում էի, որ բոլոր մարդիկ տարբեր են, չէի էլ պատկերացնում, թե որքան։ Ամերիկայի եւ այս ծրագրի շնորհիվ ես ճամփորդելու ծարավ ունեցա։ Ես ավելի համարձակ դարձա իմ երազանքներում, հիմա նույնիսկ չեմ վախենում մեծ նպատակներ դնել, քանի որ ողջ սրտով հավատում եմ, որ դրանք անպայման կիրականանան։

Ինչպես ասել է մեծն Պաուլո Կոելյոն. «Եթե դու ինչ-որ բան ես ուզում, ողջ Տիեզերքը կնպաստի, որպեսզի ցանկությունդ իրականանա»։ Եվ սրանով ես պարզապես ուզում եմ շնորհակալություն հայտնել։ Ամառվա այս երեք ամիսները փոխեցին իմ աշխարհընկալումը եւ տվեցին մի հսկայական դաս, որից ես կօգտվեմ իմ ողջ կյանքի ընթացքում։