Սկզբի համար մի փոքր պատմեմ ինձ մասին։ Անունս Բեկարիս է, բայց ընկերներս ինձ Բեկա են անվանում։ Ես 19 տարեկան եմ։ Ծնվել եւ ապրում եմ Ալմաթիում։ Սովորում եմ Տ. Ժուրգենովի անվան արվեստի ակադեմիայում՝ խաղարկային կինոյի ռեժիսորի մասնագիտությամբ։ Գիտակից տարիքում ստեղծագործական ուղին ընտրելը ինձ համար իմ նպատակին հասնելու առաջին քայլն էր, որի մասին երազում էի մանկության տարիներին՝ ամեն գիշեր քնելիս։
11 տարեկանից զբաղվում եմ բրազիլական ջիու-ջիցուով։ Այս մարզաձեւը ինձ համար շատ հետաքրքիր էր, այնքան, որ եղբորս հետ գրեթե ամեն օր մարզասրահում էի։ Այժմ ունեմ կապույտ գոտի, բազմաթիվ մրցանակներ միջազգային եւ հանրապետական մրցումներից։ Այս մարզաձեւի, հոբբիիս եւ քրտնաջան աշխատանքի շնորհիվ իմ առաջին ինքնուրույն ուղեւորությունը տեղի ունեցավ 2019 թվականին՝ 16 տարեկանում, Աբու Դաբիում կայացած աշխարհի առաջնության ժամանակ։ Իհարկե, այդ պահին իմ առաջին նպատակը մրցակցությունն էր, իսկ հետո նոր մտածում էի ճանապարհորդության մասին։ Բայց ստացվեց այնպես, որ մրցումների երկրորդ օրը չկարողացա հաղթել բրազիլացի մրցակցիս։ Մնում էր հետեւել երկրորդ նպատակին՝ ճանապարհորդել, զբոսնել եւ ուսումնասիրել Աբու Դաբին։
Ես ընկերացա թիմիս տղաների հետ, եւ մենք սկսեցինք միասին վայելել անհոգ ու վառ օրերը։ Մեր օրվա ռեժիմը սկսվում էր նախաճաշից, մենք փորձում էինք այն բաց չթողնել։ Նախաճաշից հետո շտապում էինք լողափ՝ տաքանալու, ալիքների ձայնը լսելու եւ հանգստանալու։ Մենք շատ էինք զբոսնում։ Եղանակը բավականին շոգ էր՝ +33;+36°C, բայց կարծում եք՝ դա կխանգարե՞ր 16-ամյա տղային, ով առաջին անգամ ինքնուրույն դուրս էր եկել արտասահման։ Մենք օրվա կեսից ավելին այդպես էինք անցկացնում, իսկ երեկոյան գնում էինք մեր հյուրանոցի տանիքում գտնվող լողավազան։ Այսպիսով, ես այցելեցի շեյխ Զայեդի մզկիթ, «Լուվր Աբու Դաբի», «Ferrari World» այգի եւ շատ ուրիշ վայրեր։ Ինձ ամեն ինչ դուր եկավ՝ եւ՛ Լուվրը, եւ՛ մզկիթը, այն պարզապես հիանալի է։ Անպայման խորհուրդ եմ տալիս այցելել դրանք։
Ի՞նչ հույզեր պարգեւեց այս ճանապարհորդությունը։
Համաձայնեք, որ միայն առաջիկա ուղեւորության սպասումն արդեն ուրախություն է պարգեւում։ Իսկ ճանապարհորդության ընթացքում դուք բազմաթիվ հնարավորություններ ունեք դրական տպավորություններ ստանալու։ Դուք կարող եք վայելել բնության գեղեցկությունը, մարդու ձեռքով կերտված մշակութային եւ ճարտարապետական հուշարձանները։ Ճանապարհորդության ընթացքում դուք կզարմանաք, կհիանաք եւ կզգաք վառ հույզերի հսկայական գամմա, կսովորեք նոր բաներ։ Այսպիսով, ես առաջին անգամ ինքնուրույն այցելեցի մեկ այլ երկիր եւ հստակ զգացի այն ամենը, ինչ նկարագրեցի վերեւում։ Այս ուղեւորության ընթացքում ես ինձ զգացի որպես հասուն մարդ, ով լիովին պատասխանատվություն է կրում իր կյանքի համար։
