Երեքշաբթի օրը դպրոցում իմ առաջին օրն էր։ Ես տարրական դպրոցում ուսուցչի օգնական էի։ Ամեն առավոտ մենք մի քանի կամավորների հետ տաքսիով գնում էինք դպրոց։ Ճանապարհը մեքենայով տեւում էր 15-20 րոպե։ 5-6 տարեկան երեխաների հետ աշխատելը շատ հոգնեցուցիչ է, բայց նրանք առաջին հայացքից գրավում են սիրտդ։ Այս երեխաները շատ քաղցր են, ուրախ, հիանալի խոսում են անգլերեն եւ շատ տաղանդավոր են։ Ես խաղում էի երեխաների հետ, օգնում նրանց առաջադրանքների հարցում, հետեւում նրանց, ինչպես նաեւ կատարում ուսուցչուհու տված տարբեր հանձնարարություններ։

Դպրոցը սկսվում էր 8:00-ին, դասերը ավարտվում էին 13:00-ին։ 10:00-ին սննդի ընդմիջում էր թե՛ երեխաների, թե՛ մեզ՝ կամավորներիս համար։ Մեր դպրոցը գտնվում է քաղաքի կենտրոնում, եւ մոտակայքում կա շատ հարմարավետ սրճարան, որտեղ մենք ամեն օր գնում էինք նախաճաշելու։ Մատուցողներն արդեն ճանաչում էին մեզ բոլորիս, հիշում էին, թե ով ինչ է պատվիրում, այդ ընթացքում մենք բոլորս ընկերացել էինք :) Ես միշտ վերցնում էի լատտե եւ banana bread (աներեւակայելի համեղ է!)։

Դպրոցն ինքնին մեծ է, շրջապատված է բարձր ցանկապատով, անվտանգությունը բարձր մակարդակի վրա է, նրանք ունեն իրենց մանկական խաղահրապարակը, մարզադահլիճը, լողավազանը։ Հանգստյան օրերին մենք վերջապես կարողացանք լավ քնել։