Օգոստոսի 30-ի նամակը։
Ուղարկող՝ Անաստասիա Լեբեդեւա, Հյուստոն, Տեխաս
Ստացող՝ Մայրիկ, Ղազախստան
Բարեւ, մամ։ Մեզ մոտ ամեն ինչ հիանալի է։ Մենք Հյուստոնում ենք՝ Տեխաս նահանգում։ Հինգշաբթի օրերին թանգարանների մեծ մասի մուտքն անվճար է, ուստի մենք փոքրիկ շրջագայություն ենք պլանավորել։ Բայց սկզբում այցելեցինք Գրին պարկ՝ գեղեցիկ շատրվանով եւ հաճելի մթնոլորտով։ Իսկական օազիս քաղաքի կենտրոնում։ Մտանք Greyhound-ի մոտ գտնվող Մակդոնալդս։ Այո, մերինի հետ չես համեմատի։ Խնձորով կարկանդակներին երկար սպասեցինք։ Ըմպելիքի հավելում (refill) չկա։ Ամենուր տարօրինակ մարդիկ են, հաճելի չէ։
Գնացինք Պլանետարիում՝ դիտելու 20-րոպեանոց ֆիլմ՝ «Տիտանիկի գիշերը»։ Նստում ես հարմարավետ բազկաթոռին, իսկ գլխավերեւումդ մեծ գմբեթ է՝ նստիր ու վայելիր ֆիլմը։ Մեզ մանրամասն պատմեցին աղետի պատճառ դարձած ճակատագրական սառցալեռան ծննդյան մասին։ Ցույց տվեցին ողբերգությունը իր ողջ վեհությամբ։
Այցելեցինք նաեւ հնէաբանության սրահ։ Այստեղ ցուցադրված են նախկինում գոյություն ունեցած կյանքի ձեւերի իրական մնացորդները։ Սկսած տրիլոբիտներից, փոքր ծովային բնակիչներից, սրածայր ատամներով նախապատմական կատուներից, վերջացրած դինոզավրերով, մամոնտներով եւ մարդով։ Նման բան մենք դեռ չէինք տեսել։ Իրական չափերով վերարտադրված դինոզավրերը վախեցնում են իրենց չափերով։ Այո, նրանք գոյություն են ունեցել։ Եթե հիմա փողոցով նման հսկայական գազան վազեր))) Սարսափելի է...
Մենք եղանք նաեւ մեկ այլ թանգարանում, որտեղ մուտանտ-քանդակների անսովոր ցուցահանդես էր։ Գումարած լուսանկարներ։ Հետաքրքիր լուծումներ, գույներ, գաղափարներ։ Հուզիչ։ Տպավորիչ։
Ոտքով քայլեցինք, բավականին մեծ տարածություն անցանք։ Երեկոյան Անյան հանդիպեց Կուրալայի հետ, ով այժմ սովորում է Հյուստոնում։
Իսկ մենք ապրում ենք հոսթելում՝ աշխարհի տարբեր ծայրերից եկած ճանապարհորդների հետ։ Մտերմացանք Մեծ Բրիտանիայից եկած Քեթրինի հետ։ Նա պատմեց մեզ իր պատմությունը։ Շատ բարեհամբույր եւ բաց մարդ է, պատմեց, որ արդեն երկու ամիս է՝ ճանապարհորդում է, հատել է ողջ Կանադան եւ Ամերիկայի կեսը։ Ալյասկայում հանդիպել է արջի, այցելել է Գրանդ Կանյոն, Սան Ֆրանցիսկո եւ այլ քաղաքներ։
Մենք այստեղ չենք ձանձրանում։ Վաղը թռչում ենք Արիզոնա։ Նոր Օռլեան հասնել չստացվեց։ Ինչպե՞ս է Օլեգը, կարտոֆիլն արդեն հանո՞ւմ եք։ Շուտով կգանք, մի՛ կարոտեք։
P.S. Լավ ենք սնվում :)
