What happens in Vegas stays in Vegas. Հենց այս հայտնի արտահայտությունը կդիմավորի ձեզ դեռ օդանավակայանում, եւ, իհարկե, խաղային ավտոմատները։ Խաղային ավտոմատներն այստեղ ամենուր են, նույնիսկ եթե ԴՈՒՔ այստեղ գաք այն հաստատ համոզմունքով, որ ավտոմատների վրա չեք ծախսի նախատեսված գումարից ավել կամ ընդհանրապես ոչ մի ցենտ, մի խաբվեք. ներդրողները այս օազիսը անապատի մեջտեղում չեն կառուցել այն բանի համար, որ ԴՈՒՔ «պարզապես գաք նայելու»։ Առավել եւս, ճգնաժամի հետ կապված, այստեղ փոխվել է շահումը ստանալու համակարգը, որն այլեւս չի թափվում մեղեդային զանգով ավտոմատներից, այլ մուտքագրվում է որոշակի հաշվի, որը կարող եք կանխիկացնել, երբ ավարտեք խաղալը, հատուկ բանկոմատներում։ Այժմ հարցը միայն այն է, որ ավարտեք խաղալը մինչեւ այն պահը, երբ կպարտվեք ամբողջ գումարը՝ շահածի հետ միասին։ Լավ է, որ գոնե պահպանվել է հաստատության հաշվին խաղացողներին ալկոհոլային(!) կոկտեյլներով հյուրասիրելու ավանդույթը։ Ընդհանրապես, պետք է ասել, որ Լաս Վեգասի կոկտեյլները հենց այն են, ինչ պետք է։J

Ես Լաս Վեգասում առաջին անգամ էի եւ, իհարկե, ինձ առաջին հերթին հետաքրքրում էին հայտնի զբոսաշրջային փողոցի՝ Strip-ի հյուրանոցները, այնտեղ գտնվելուս երեք օրվա ընթացքում ես այդպես էլ չհասա այլ փողոցներ։ Այս փողոցի յուրաքանչյուր հյուրանոց տեսարժան վայր է։ Որոշ հյուրանոցներ կառուցված են հայտնի քաղաքների կամ վայրերի տեսքով՝ Paris, New York, The Venetian, Luxor։ Ընդ որում, դրանք ստեղծում են այդ վայրերի մթնոլորտը ոչ միայն դրսից, այլեւ ներսից՝ իրենց մեջ տեղավորելով բազմաթիվ փողոցներ՝ խանութներով եւ ռեստորաններով, իսկ The Venetian-ում՝ նաեւ իրական ջրանցքներ՝ գոնդոլներով եւ երգող գոնդոլյերներով։ Իսկ հյուրանոցների առաստաղին նկարված երկինքը ստիպում է մոռանալ, որ գտնվում ես շենքի ներսում, իսկ հետո սկսում ես ընդհանրապես շփոթել, թե երբ ես դրսում, իսկ երբ՝ ներսում։ Թեեւ դրսում ցերեկը գտնվելը գրեթե անհնար է՝ 50 աստիճան շոգ, միայն բազմաթիվ մեքսիկացիներն են դրան դիմանում, նրանց աշխատանքն է՝ կանգնել եւ զբոսաշրջիկների առաջ թափահարել մարմնավաճառների այցեքարտերը։ Դատելով այցեքարտերի եւ մեքսիկացիների քանակից՝ Լաս Վեգասում նրանց բիզնեսը լավ է ընթանում։ Sin City, ի վերջո։ Փոխարենը գիշերը Լաս Վեգասում շատ հարմարավետ է՝ 28 աստիճան եւ մեքսիկացիները գրեթե չկան։

Ամերիկացիները հաճախ են գալիս Լաս Վեգաս՝ շոուներ դիտելու։ Այստեղ անցկացվում են աշխարհի լավագույն շոուները ցանկացած ճաշակի համար՝ էրոտիկ, աստղերի մասնակցությամբ, երեխաների համար, դասականի սիրահարների համար եւ կրկին էրոտիկ, դրանք այստեղ, այնուամենայնիվ, ավելի շատ են։J Շոուները լինում են վճարովի՝ դրանց արժեքը գերազանցում է 100 դոլարը, եւ անվճար՝ նույնպես բացարձակապես ցնցող՝ Sirens of Treasure Island, Streetmosphere, Bellagio հյուրանոցի երգող շատրվանները եւ այլն, որոնց մասին տեղեկատվությունը կարելի է քաղել անվճար բուկլետից, որը կարելի է գտնել հյուրանոցներում եւ առեւտրի կենտրոններում։

Լաս Վեգասում կարելի է հուշանվերներ ձեռք բերել ամբողջ ընտանիքի համար եւ այլեւս չանհանգստանալ այդ մասին մինչեւ հայրենիք վերադառնալը։ Դա ամենաձեռնտու կերպով կարելի է անել Wallgreens եւ ABC Stores խանութներում։ Դրանք մեծ խանութներ են, որոնք Դուք անպայման կգտնեք Strip փողոցում։

Իսկ երբ հեռանում ես Լաս Վեգասից՝ մի փոքր տխուր է, չէ՞ որ այնտեղ հավերժական տոն է, իսկ դու վերադառնում ես առօրյային։ Եվ արդեն մի քանի օր անց կթվա, որ Լաս Վեգասը երազ էր, հեքիաթ, իսկ իրականում ոչ մի այդպիսի բան էլ չի եղել։J