Ապրի՛ր լիարժեք։ Շտապի՛ր։ Շտապի՛ր իրականացնել այն ամենը, ինչ մտածել ես։ Այն, ինչի մասին երազել ես, ինչի մեջ ցանկացել ես ինքնադրսեւորվել։ Իսկ իրականացնելուց հետո՝ մտածի՛ր նորը եւ շտապի՛ր ստեղծել այն։ Կյանքը մի ակնթարթ է, այն կթռչի, եւ դու կզարմանաս՝ «ինչպե՞ս այն այդքան արագ անցավ»։ Եվ այդ մտքերից իսկապես կվախենան միայն նրանք, ովքեր իրենց հատկացված ժամանակը «անցկացրել» են, այլ ոչ թե ապրել։ Մահվան դեմ հանդիման ավելի սարսափելի կլինի նրանց համար, ովքեր ավելի քիչ են իրենց իրացրել։ Ե՛վ քանակական, եւ՛ որակական առումով։ Նրանք, ովքեր շատ բանի չեն հասցրել եւ, թեեւ հոգու խորքում միշտ զգացել են դա, բայց շարունակել են զբաղվել «ոչ այն բանով»։ Այնպես որ, եթե զգում ես, որ զբաղվում ես «ոչ այն բանով», որի մեջ քեզ տեսնում էիր կամ կցանկանայիր տեսնել, եթե ձգտում ես հասնել այնպիսի գագաթների, որոնք քեզ (ներքին, «իսկական քեզ») այնքան էլ պետք չեն եւ կարեւոր չեն՝ շտապ հրաժարվի՛ր դրանից։ Դարձի՛ր դեպի քեզ եւ այն ամենին, ինչ ուզում ես դու, քո «ներքին ԵՍ»-ը, եւ վարվի՛ր այնպես, ինչպես կհուշի քո սիրտը։ Միայն այն՝ ոչ մայրը, ոչ հայրը, ոչ ընկերները կամ ծանոթները՝ ոչ ոք աշխարհում, բացի նրանից, չի ասի քեզ, թե ինչ ես ուզում դու կյանքից։ Եվ միայն սրտին ականջ դնելով կարելի է հասկանալ ինքդ քեզ։ Այլ ճանապարհ ինձ հայտնի չէ։
Պետք է շտապել ապրել։ Չվախենալ որեւէ մեկի կողմից մերժվելուց։ Չվախենալ փորձել եւ փորձել տարբեր եղանակներ՝ ցանկալիին հասնելու համար։ Որպեսզի մի օր հանդիպելով քո մահվանը՝ դու արդեն փորձած լինես մինչեւ «չեմ ուզում», լիարժեք իրացրած լինես քեզ եւ բոլոր առումներով այլեւս կենդանի չլինես՝ մահվանը հասնելով որպես մահացած։ Եվ սկսել այդպես ապրել, ես հաստատ համոզված եմ, ցանկացած տարիքում ուշ չէ։ Նույնիսկ եթե քո ձեռքերն ու ոտքերը չեն շարժվում, եւ դու նստած ես հաշմանդամի սայլակին։ Չէ՞ որ եթե գլուխդ աշխատում է եւ դու գտնվում ես պարզ գիտակցության մեջ՝ դու դեռ ինչ-որ բանի ընդունակ ես։
Լիակատար անգործունակության տարբերակն ընդունվում է միայն այն դեպքում, երբ դու կամ մահացած ես, կամ կոմայի մեջ, կամ խելագարված։ Մնացած բոլոր դեպքերում դու գոնե ինչ-որ բանի ընդունակ ես։ Եվ ուզում եմ ասել, որ ես հավատում եմ քեզ, մարդ, ով էլ որ դու լինես։
23:03, 19 նոյեմբերի, 2008թ.
