ძალიან დიდი ხნის წინ, როცა ჯერ კიდევ პატარა ვიყავი, მიყვარდა ცნობილი სიმღერის „if you are going to San Francisco, be sure to wear some flowers in your hair“ აყოლა და მაშინ ოცნებასაც კი ვერ ვბედავდი, რომ ოდესმე მართლა აღმოვჩნდებოდი სან-ფრანცისკოში... საკუთარი თვალით ვნახავდი Golden Gate Bridge-ს, გავივლიდი ვიწრო ქუჩებში და ვიმგზავრებდი ტრამვაით... მაგრამ ცხოვრება ხშირად გვთავაზობს მოულოდნელ სიურპრიზებს და აი, მე ჩემი ოცნებების ქალაქში ვარ!

ოჰ, სან-ფრანცისკო! ამ ვიწრო ქუჩებში სეირნობა, აღმართ-დაღმართ სიარული – დიდი სიამოვნებაა! აქ Golden Gate-ის გარდა ბევრი რამ არის სანახავი! სან-ფრანცისკოში იპოვით ამერიკის უძველეს ჩაინა-თაუნს, სადაც შეგიძლიათ ჩინურ რესტორანში დაჯდეთ ან შეიძინოთ იაფი წვრილმანები და სუვენირები. ასევე აუცილებლად იპოვეთ ის უბანი, საიდანაც დაიწყო ჰიპების მოძრაობა, სადაც ვიწრო ქუჩებში სეირნობისას შეგიძლიათ შეხვდეთ ბევრ უჩვეულო და საინტერესო ადამიანს, შეხვიდეთ კაფეში ან უბრალოდ დაისვენოთ ფანჯრიდან გამომავალი რეგის მუსიკის ფონზე. სან-ფრანცისკოში აუცილებლად გაისეირნეთ პარკში, რომელიც, თუ არ ვცდები, ფართობით ნიუ-იორკის Central Park-ზე დიდია. იყიდეთ ყავა Starbucks-ში და ნელა გაისეირნეთ ვიქტორიანულ სტილში აშენებულ მყუდრო ქუჩებში. და რა თქმა უნდა, არ დაგავიწყდეთ ალკატრასის მონახულება! კუნძული, სადაც ცნობილი ციხე დგას, თავისთავად ძალიან ლამაზია, უკვე იქიდან გადაშლილი ხედების გამო ღირს ექსკურსიაზე წასვლა. რაც შეეხება ციხეს... დღემდე ჟრუანტელი მივლის, როცა ალკატრასს ვიხსენებ... საზარელი ადგილია, მაგრამ რაღაცით იზიდავს ადამიანს... ღირს სულ რაღაც რამდენიმე წუთით შეხვიდეთ საკანში, რათა თავიდან დაიწყოთ ცხოვრებისა და თავისუფლების ყველა სიკეთის დაფასება.