მნიშვნელოვანი დოკუმენტები პროგრამის მონაწილეებისთვის

1. პროგრამის შეთანხმება – როდესაც გადაწყვეტთ პროგრამაში მონაწილეობას, შემდეგი ნაბიჯი არის შეთანხმების ხელმოწერა. ყურადღება მიაქციეთ თანხის დაბრუნების ნაწილს – რა შემთხვევებში და რა ოდენობით არის შესაძლებელი თანხის დაბრუნება. ასევე მნიშვნელოვანია ყურადღებით გაეცნოთ თქვენს უფლებებსა და მოვალეობებს, სამსახურის ძიების პირობებს და გაქვთ თუ არა ჯანმრთელობის დაზღვევა. ზოგჯერ კომპანიები გვთავაზობენ დაბალ ფასს პროგრამისთვის, მაგრამ მოგვიანებით ირკვევა, რომ არსებობს მრავალი დამატებითი ხარჯი, რომლებიც თავდაპირველად არ იყო მითითებული. სასურველია, მისცეთ თქვენს მშობლებს კონტრაქტის წაკითხვის საშუალება, რათა მათაც შეძლონ მისი შინაარსის გაცნობა. 2. DS-2019 ფორმა არის საკვანძო დოკუმენტი, რომლითაც შეძლებთ J-1 visa-ზე განაცხადის შეტანას. მიუხედავად იმისა, რომ ეს არის ჩვეულებრივი A4 ფორმატის დოკუმენტი, მისი გაცემის უფლება მხოლოდ შეზღუდული რაოდენობის სპონსორ ორგანიზაციებს აქვთ. 3. J-1 visa – ეს ვიზა გაძლევთ საშუალებას ლეგალურად იმუშაოთ აშშ-ში ზაფხულის არდადეგების დროს. 4. პასპორტი ერთ-ერთი ყველაზე მნიშვნელოვანი დოკუმენტია. ის დაგჭირდებათ არა მხოლოდ პროგრამაზე რეგისტრაციისთვის, არამედ ვიზის მისაღებად და შეერთებულ შტატებში გამგზავრებისთვის. პასპორტი უნდა იყოს მოქმედი პროგრამის დასრულებიდან სულ მცირე 6 თვის განმავლობაში. 5. I-901 ფორმა არის SEVIS Fee-ს (Student and Exchange Visitor Information System) გადახდის დამადასტურებელი დოკუმენტი. SEVIS არის სისტემა, რომელსაც აშშ-ს მთავრობა იყენებს საერთაშორისო სტუდენტებისა და გაცვლითი პროგრამის მონაწილეების მონიტორინგისთვის, რათა დარწმუნდეს, რომ ისინი ქვეყანაში იმყოფებიან ლეგალურად და პროგრამის პირობების დაცვით. გადასახადის გადახდის დამადასტურებელი დოკუმენტი საჭირო იქნება აშშ-ს საელჩოში ვიზის ინტერვიუზე. დაკავშირებული თემები: - DS-2019 ფორმა - J-1 Visa - პასპორტი - I-901 ფორმა