ვფიქრობ, თითოეულ ადამიანს აქვს ოცნება. ჩემი ოცნება ყოველთვის იყო მენახა რაც შეიძლება მეტი ქვეყანა და შევხვედროდი საინტერესო ადამიანებს მსოფლიოს სხვადასხვა კუთხიდან. უცნაურია, მაგრამ ამერიკა ჩემს სიაში არც კი ყოფილა, რადგან ყოველთვის მეგონა, რომ ამისთვის მინიმუმ მილიონერი უნდა ყოფილიყავი ან ბანკი უნდა გაგეძარცვა.

ჩემდა საბედნიეროდ, ერთხელ ინტერნეტში სერფინგისას წავაწყდი რეკლამას მოწოდებით "America is waiting for you" და გადავწყვიტე, რომ ეს ნიშანი იყო. ასე დაიწყო ჩემი სამთვიანი ისტორია.

თავიდან თითქმის არაფრის გაკეთება არ მიწევდა. ვაგზავნიდი საჭირო დოკუმენტებს და ვასრულებდი მითითებებს.

მაისთან ახლოს ყველაფერი თავდაყირა დადგა. განაცხადთან დაკავშირებით გარკვეული პრობლემები იყო, ამიტომ DS-2019 ფორმას მოსალოდნელზე მეტხანს ველოდი. დავკარგე დოკუმენტების საქაღალდე, საბედნიეროდ, 3-დღიანი ძებნის შემდეგ ვიპოვე. ვერ ვნიშნავდი ინტერვიუს ჩემთვის სასურველ დროს, ამიტომ ყოველ დილით ვაკვირდებოდი საელჩოს ვებგვერდს იმ იმედით, რომ შესაფერის თარიღს დავინახავდი, რამაც საბოლოოდ შედეგი გამოიღო. ყველა ფორმალური ნაწილის გავლის შემდეგ, დარჩა ერთადერთი და ყველაზე საინტერესო ნაბიჯი - შეხვედრა კონსულთან.