ტემპე, არიზონა

მელისა

ჩვენ ვზივართ წაქცეულ ხეებზე 'Grand Canyon National Park'-ის ტყეში და სენდვიჩებს ვჭამთ. ხეების მიღმა ჩანს კანიონი. დიდი კანიონი. უზარმაზარი კანიონი, ჰორიზონტამდე. ღრმა კანიონი - კიდეზე დგომისას გგონია, რომ ციდან, ჩიტის ფრენის სიმაღლიდან უყურებ მიწას.

დიდი კანიონის კიდეზე სადილი ამ ზაფხულის ერთ-ერთი ყველაზე ნათელი მომენტია.

• აბა, როგორ მოგწონს? - მეკითხება მელისა. რუსულად.
• Actually I had no idea that the Grand Canyon is SO GREAT!

მელისას ორი წლის წინ მოსკოვში შევხვდი. განსაკუთრებულად არ ვურთიერთობდით, უბრალოდ ხანდახან ვხედავდით ერთმანეთს. ცოტა გამიკვირდა, როცა მომწერა, რომ აუცილებლად უნდა შეგვენარჩუნებინა კავშირი და მთხოვა, რუსულად მიმეწერა, რადგან მისთვის მნიშვნელოვანი იყო ენის არ დავიწყება. ამიტომ ჩვენი მეგობრობა უფრო მიმოწერით დაიწყო და უფრო დავახლოვდით მას შემდეგ, რაც მელისა აშშ-ში დაბრუნდა.

მელისა ცხოვრობს ფენიქსის ერთ-ერთ გარეუბანში, არიზონას შტატში. ექვსი თვის წინ, როგორც კი გაიგო აშშ-ში ჩვენი ჩამოსვლის შესახებ, მან ჩემს Facebook-ის კედელზე გამოაქვეყნა დიდი კანიონის შესახებ ვიკიპედიის სტატიის ბმული. მაშინ ჯერ კიდევ არ მჯეროდა, რომ მას ვნახავდი...

...და ახლა, დაბრუნებიდან სამი თვის შემდეგ, არ მჯერა, რომ მე ის ვნახე.

მთელი ეს ზაფხული რაღაც არარეალური, არაჩვეულებრივი და შორეული ჩანს. ჩანს მანამ, სანამ რომელიმე საუბრისას შემთხვევით არ წამოგცდება „Oh, stupid everything!“ ან „მორჩა, I don't wanna talk about it!“, და კიდევ „She's cranky“, „That's gross“, „That's harsh“ და გაგახსენდება, რომ „it's so Melissa!“ ))