Waterfront-ი, არსებითად, ქალაქის ყველაზე პოპულარული (ან ცენტრის ტოლფასი) უბანია. ალბათ, ყველაზე ლამაზიც. სამოცდაათიან წლებამდე ის არ არსებობდა, მის ადგილას ოკეანე იყო. მაგრამ შემდეგ მიწა შეავსეს და ოკეანეს ჰექტრობით ფართობი წაართვეს. ახალ ადგილას კი Waterfront-ი და Mouille Point-ი ჩამოყალიბდა. Waterfront-ში ყურეა. ამბობენ, რომ ათი-თხუთმეტი წლის წინ იქ ბინძური იყო, უსიამოვნო სუნი იდგა და სანახავი არაფერი იყო. მაგრამ თანდათანობით ადგილი მაღაზიებით, ხეივნებით, რესტორნებით, კლუბებითა და ძეგლებით ააშენეს, რამაც Waterfront-ი ქალაქის ყველაზე პოპულარულ ადგილად აქცია.
რაც შეეხება Mouille Point-ს: ის მთლიანად შედგება ღია პარკებისგან, საბავშვო მოედნებისა და ველოსიპედის, სირბილისა და სასეირნო ბილიკებისგან.
აღსანიშნავია, რომ აქ დროის გასატარებლად სამი ყველაზე ხალხმრავალი და სასიამოვნო ადგილია: ცენტრი, Waterfront-ი და Camps Bay-ის პლაჟი, რომელსაც იგივე სახელი აქვს, რაც უბანს. მართალია, ამ უკანასკნელ ადგილას აფრიკულ ზამთარში უკაცრიელობა და სიჩუმეა.
ხოლო Waterfront-ი და ცენტრი მთელი წლის განმავლობაში ხმაურობენ.
მითქვამს თუ არა, რომ ახლა, ოქტომბრიდან, მოსკოვთან დროის სხვაობა მხოლოდ ერთი საათია?! ჩვენ ერთი საათით ჩამოვრჩებით. ჩელიაბინსკიდან კი — სამით.
დავურეკე კატიუშკას და სტუმრად დავპატიჟე. მოვიდა, მიყვება, რომ დღეს დაიღალა. მთელი დღე მაღაზიებში დარბოდა და ისეთ ფეხსაცმელს ეძებდა, რომელიც მოეწონებოდა. ასეთი ვერ იპოვა, მაგრამ თქვა, რომ ლამაზი კაბა იყიდა. ჯეიმსს უნივერსიტეტში გამოსაშვების მსგავსი რამ ექნება, დიპლომი მიიღო — ჰოდა, მანაც გადაწყვიტა ამ მოვლენისთვის გამოპრანჭულიყო.
— როგორ მსჯელობს ქალი?! წავედი, ესე იგი, მაღაზიაში ფეხსაცმლის ასარჩევად! — მიყვება კატია, — არცერთი ფასონი არ მოერგო! დიდხანს ვიზომე კაბები, მაგრამ ისეთი ვერ ვიპოვე, რომელიც თვალების ფერს მოუხდებოდა. რა უნდა მექნა? მომიწია ჩანთის ყიდვა!
ის ყოველთვის ამ მაგალითს მოჰყავს ქალური ლოგიკის შესახებ და ამბობს, რომ თვითონაც ხშირად იქცევა ასე.
2008 წლის 26 ნოემბერი
