ჩემი 2014 წლის ზაფხული ყველაზე საინტერესო და შემეცნებითი აღმოჩნდა. ვთვლი, რომ ძალიან გამიმართლა, რომ ამ პროგრამის მონაწილეთა სიაში აღმოვჩნდი. ამერიკაში ჩასვლისას ჯერ კიდევ ვერ ვიჯერებდი და ვერ ვაცნობიერებდი, რომ იქ ვიყავი და დიდი დრო დამჭირდა გონს მოსასვლელად. სწორედ ამ ქვეყანაში მოხვედრა ჩემი დიდი ხნის ოცნება იყო. პროგრამა თითოეულ სტუდენტს აძლევს შესაძლებლობას აიხდინოს ოცნება და მიიღოს უზარმაზარი გამოცდილება ფაქტიურად ყველაფერში, კერძოდ: გააუმჯობესოს ინგლისური სასაუბრო ენა, იმუშაოს მომსახურების სფეროში, თანაც სხვა ქვეყანაში, რადგან იქ ყველაფერი სხვანაირია, რაღაცნაირად უფრო საინტერესო და მხიარულია მუშაობა. სხვადასხვა ქვეყნის სტუდენტებთან ურთიერთობით, იგებ მათ ტრადიციებს, წეს-ჩვეულებებს, კულტურას და იძენ ახალ მეგობრებს. სხვა ქვეყანაში სრულიად მარტო ჩასული, ცდილობ თავი დააღწიო სხვადასხვა სიტუაციებს, რადგან იცი, რომ გვერდით არ გყავს მშობლები და ახლობლები; ყველა გადაწყვეტილებას თავად იღებ, ყველაფერს უმცირეს დეტალებამდე აზუსტებ. სწავლობ დამოუკიდებლად ცხოვრებას, საკუთარ თავზე ზრუნვას, ასე ვთქვათ „გადარჩენას“ და ეს გაქცევს დამოუკიდებელ და პასუხისმგებლიან ადამიანად. ეს ყველაფერი შენს ცხოვრებაში კარგი გამოცდილებაა.