ვიზის მიღების შემდეგ სიმსუბუქეს გრძნობ და იწყებ ფიქრს ბარგზე, რა წაიღო თან და რაზე თქვა უარი, და უკვე წარმოიდგენ შენს პირველ დღეებს ამერიკაში, ასე ვთქვათ, ჩნდება ის „ჩემოდანის განწყობა“. მეც ასე ვიყავი, პასპორტის მიღებისა და ყველა გამოცდის ჩაბარების შემდეგ, დავიწყე ჩემოდნის ჩალაგება და გავემართე ჩემი საზაფხულო არდადეგებისკენ.
მეგობრებთან ერთად ვენის გავლით მივფრინავდი. ეს არ იყო ადვილი და ძალიან გრძელი ფრენა იყო ნიუ-იორკამდე, გზას საერთო ჯამში დაახლოებით 15-16 საათი დასჭირდა. ნიუ-იორკში ჩაფრენისას არც კი მჯეროდა, რომ მთელი ოკეანე გადავკვეთე და მთელი ზაფხული ოჯახისგან შორს, უცხო გარემოში უნდა მეცხოვრა. ჩემს ბედნიერებას საზღვარი არ ჰქონდა და ემოციები გადმომედინებოდა, როდესაც მოვხვდით მსოფლიოს ერთ-ერთ ყველაზე მონახულებად ღირსშესანიშნაობაში, ცნობილ Times Square-ზე, მე და ჩემი მეგობრები უბრალოდ გაოცებულები ვიდექით.
სამწუხაროდ, მაშინ ქალაქში სასეირნოდ დრო არ გვქონდა, რადგან უკვე ნაყიდი გვქონდა ბილეთები ჩვენს ქალაქამდე. ყველა მეგობარი თავიანთ ქალაქებში გაემგზავრა და ჩვენ დავრჩით ორნი მეგობართან ერთად. ჩვენი Job offer იყო ვისკონსინის შტატის ცენტრალური ნაწილის სამხრეთით მდებარე ქალაქში - Wisconsin Dells.
ბილეთები ვიყიდეთ ავტობუსზე, ყველასთვის ცნობილ Greyhound-ზე და 25 საათი უნდა გვემგზავრა ხუთი გადაჯდომით. რა თქმა უნდა, ბევრი იტყვის, რომ თვითმფრინავით ფრენა უფრო ადვილი იქნებოდა, შესაძლოა ასეც არის, მაგრამ ფრენამდე წაკითხული მქონდა ამდენი კომენტარი და მოსმენილი მქონდა ბევრი ისტორია, თუ როგორ ყვებიან, რომ 15-25 საათი მგზავრობდნენ ავტობუსით და ეს საშინელება იყო და არასოდეს დაივიწყებენ ამ გზას) ჰოდა, მეც მომინდა თავგადასავლებით ჩავსულიყავი, რათა ჩვენი მგზავრობა მთელი ცხოვრება დაგვმახსოვრებოდა, ნუ, საერთო ჯამში, ასეც მოხდა, საშინლად დიდხანს ვიმგზავრეთ, საბედნიეროდ ავტობუსში იყო Wi-Fi და როზეტები, და ავტობუსები ძალიან კომფორტულია, მაგრამ ერთი მინუსი ისაა, რომ ძალიან, ძალიან ცივა და ზოგადად ამერიკაში ტრანსპორტის ყველა სახეობაში (თვითმფრინავი, მატარებელი, ავტობუსი) ძალიან ცივა, ყინავს უბრალოდ, განსაკუთრებით ღამით. ასე რომ, ჩემი რჩევაა, თუ თქვენც გადაწყვეტთ ავტობუსით მისვლას თქვენს ქალაქამდე, თან წაიღეთ მეტი თბილი ტანსაცმელი, ან კიდევ უკეთესი, პატარა კომფორტული პლედი.
