შემდეგი გაჩერება ფილადელფია იყო. ეს იყო საოცარი მოგზაურობა, სავსე შთაბეჭდილებებითა და ემოციებით. მუზეუმები, შადრევნები, არქიტექტურა, უამრავი უნივერსიტეტი, საყვარელი დიზაინერული ადგილები, კაფეები, პატარა სასადილოები, ქუჩის ხელოვნება, ბოლომდე გაუგებარი სიურეალისტური მონუმენტები, ცათამბჯენები, საოცრად ჩაცმული გამვლელები – ეს ყველაფერი აღფრთოვანებას იწვევდა! ხალხი ისეთი თავისუფალი და გახსნილი ჩანდა! ვიღაც პარკში იოგათი იყო დაკავებული, ბალახზე ხალიჩა ჰქონდა გაშლილი, ვიღაც უბრალოდ მზეს ეფიცხებოდა, ვიღაც წიგნს კითხულობდა, ვიღაც ციყვებს აჭმევდა, რომლებიც, გასაკვირად, შინაური ცხოველებივით იქცეოდნენ – იმ მომენტში თავი ნამდვილი ამერიკული ცხოვრების ნაწილად ვიგრძენი.

აშშ-ში მოვახერხე ჩემი ამერიკული სრულწლოვანების – 21 წლის იუბილეს აღნიშვნა. ეს იყო ძალიან სახალისო, სხვადასხვა ქვეყნიდან ჩამოსული ჩემი ახალი მეგობრების, მათ შორის ამერიკელების წრეში. დანამდვილებით შემიძლია ვთქვა, რომ ეს იყო ჩემი ყველაზე დაუვიწყარი და უჩვეულო დაბადების დღე! სამსახურიდან თავისუფალ დღეებში ჩვენ ეზოში ვიკრიბებოდით, მწვადებს ვაკეთებდით, კოცონზე ამერიკულ ზეფირებს ვწვავდით და ერთმანეთს ჩვენი ცხოვრების ისტორიებს ვუყვებოდით.

ამერიკულ სუპერმარკეტებში პროდუქტების ასორტიმენტი არ წყვეტდა ჩემს გაოცებას: თაროები უბრალოდ სავსე იყო „ზარმაცებისთვის განკუთვნილი საქონლით“. იქ ყველაფრის და ცოტა მეტის პოვნაც კი შეიძლებოდა. მიუხედავად იმისა, რომ ამერიკული საკვებით საერთოდ არ ვიყავი აღფრთოვანებული, პირიქით, ცოტა იმედგაცრუებულიც კი დავრჩი, რადგან ის ძალიან unhealthy-ა და ქიმიითაა გაჯერებული, მაგრამ მაღაზიებში სასიამოვნო ტკბილეულის პოვნაც ადვილად შეიძლებოდა. ძალიან გამიკვირდა, რომ ამერიკაში ფასტფუდი არც ისე გემრიელია, მიუხედავად იმისა, რომ ამერიკა მთელ მსოფლიოში ფასტფუდის სამშობლოა.

Wildwood-ს განსაკუთრებული სითბოთი და მოწიწებით ვიხსენებ, რადგან ჩემი ამერიკული მოგზაურობის დიდი ნაწილი იქ გავატარე და ძალიან შევეჩვიე Wawa-ს – სასურსათო მაღაზიების ქსელს, სადაც გემრიელი selfmade ყავისთვის, სენდვიჩებისთვის და მეგობრულ ამერიკელ თანამშრომლებთან სასაუბროდ მივრბოდით, პატარა ქალაქის ასეთ მშვიდ და აუჩქარებელ ცხოვრებას, Dunkin’ Donuts-ს თავისი მაცდური დონატებით. ოჰ, როგორ მენატრება! Boardwalk-ზე კი ყოველთვის რაღაც წარმოუდგენელი ხდებოდა. უამრავი ადგილობრივი მცხოვრები, J-1 სტუდენტი და უბრალოდ დასასვენებლად ჩამოსული ამერიკელი. იქ შეიძლებოდა სხვადასხვა თამაშების თამაში, შესაბამისი კოსტიუმის ჩაცმით თავი განგსტერად გეგრძნო, ან სათამაშო ავტომატებთან ბედი გეცადა, ამერიკულ მთებზე გესეირნა, მთელი დღე წყლის ატრაქციონების პარკში გაგეტარებინა, შენს თვალწინ მომზადებული შოკოლადი გეჭამა, კარამელში ამოვლებული დიდი ვაშლები, პირსინგი ან ტატუ გაგეკეთებინა, რამდენიმე წუთში გეყიდა მაისური ან ტელეფონის ქეისი შენი ფოტოთი, დაგეგემოვნებინა ქალაქის საუკეთესო პიცა ან უბრალოდ გესეირნა, ოკეანის ჰაერით დამტკბარიყავი.