ხშირად ჩვენ ვცხოვრობთ და არ ვფიქრობთ იმაზე, თუ როგორ ვიმუშაოთ და როგორ დავხარჯოთ სწორად გამომუშავებული ფული, მაგრამ ეს მხოლოდ მანამ, სანამ თავად არ გავხდებით ზრდასრულები. ამერიკაში ჩასულმა, სრულიად მარტომ, უზარმაზარი გამოცდილება მივიღე, რადგან ყოველდღე დამოუკიდებლად რაღაცის ძიება ადვილი არ არის, მაგრამ ძალიან საინტერესოა. პირველივე დღეს გადავწყვიტე ფეხით მივსულიყავი იმ სასტუმრომდე, სადაც ჩემი Job offer იყო და წარმოდგენა არ მქონდა, სად უნდა წავსულიყავი და რამდენი დრო დასჭირდებოდა. რა თქმა უნდა, მზეზე დავიწვი, მაგრამ 40 წუთის შემდეგ ადგილზე ვიყავი. მაშინ არარეალურად მეჩვენებოდა სასტუმროში არსებული ყველაფრის დამახსოვრება. ვიბნეოდი და ყველაფერთან შეგუებას ვცდილობდი.
სწავლის დღეები ანუ ე.წ. ვარჯიშები პოლონელ გოგონასთან ერთად გავიარე, ძლივს წარმოვიდგენდი, რომ ოდესმე ვისწავლიდი ყველაფრის ისე სწრაფად კეთებას, როგორც საჭიროა და რომ შევძლებდი ამერიკაში ისეთი მტვერსასრუტის გამოყენებას, რომელიც ჩვენს ჩვეულებრივზე სამჯერ დიდია.
დრო გავიდა, პირველ კვირებში სახლში რომ ვბრუნდებოდი, ჯდომის ძალაც კი არ მქონდა. ვერ ვიტყვი, რომ housekeeping მძიმეა. ეს უფრო დამღლელია და მთელ ენერგიას გართმევს. მაგრამ ჩემთვის ეს უბრალოდ სამუშაო იყო და ზაფხულის ბოლოს უკვე შევეჩვიე კიდეც. ასეთ სამსახურშიც კი საინტერესო იყო ამერიკის სხვადასხვა კუთხიდან ჩამოსული ტურისტების გაცნობა. თითოეულ მათგანს თავისი აქცენტი და ჩვევები ჰქონდა. პერსონალთან მეგობრული ურთიერთობა ჩამომიყალიბდა.
