რა შეიძლება ითქვას ლას-ვეგასსა და ლოს-ანჯელესზე? ეს არის სრულიად განსხვავებული, უნიკალური და ერთმანეთის არაფრით ჩამორჩენილი ქალაქები - ნამდვილი გამოცანები. ჩვენი მოგზაურობის დროს განცდილი ემოციების აღწერა უსასრულოდ შეიძლება!

ჩვენ ვეგასის ერთ-ერთ საუკეთესო სასტუმროში ვრჩებოდით და ყველაფრით ვტკბებოდით. რადგან ჩემი დაუვიწყარი მოგზაურობის დროს 20 წლის ვიყავი, მაშინვე ვიტყვი: თუ 21 წელზე ნაკლები ხარ, მეგობრების დახმარებით სასტუმროში დასახლება შეგიძლია, მაგრამ ამის შემდეგ აღარ დაგეხმარებიან. კლუბები და აუზებიც კი შენთვის დახურულია. ერთ დღეს ჩვენ „ფლამინგოს“ სასტუმროში ვცხოვრობდით და ლამაზ აუზთან გარუჯვა გადავწყვიტეთ, მაგრამ უარი გვითხრეს, რადგან აუზი მხოლოდ 21 წელს ზემოთ პირებისთვისაა. თუმცა ეს არ ნიშნავს, რომ 21 წლამდე იქ არ უნდა მიხვიდეთ.

ვეგასი გართობის ქალაქია. სასტუმროების თითოეულ პირველ სართულზე კაზინოა, მთელ მთავარ ქუჩაზე - Strip-ზე დამონტაჟებულია დინამიკები, საიდანაც მთელ ქუჩაზე ერთი და იგივე მუსიკა ისმის, ყოველ ნაბიჯზე სპეციალური გამფრქვევებია და ისინი ღამითაც მუშაობენ, რადგან ვეგასი ძალიან ცხელი ქალაქია!

ირგვლივ განათებები და ასობით ადამიანია კოქტეილებისთვის განკუთვნილი უცნაური გრძელი ჭიქებით, გამოპრანჭულები და გართობისთვის მზად; უამრავი ბარი და კლუბი, რომლებიც გარყვნილებითაა სავსე; ყველგან შეიძლება შეხვდე სრულიად უცნაურ ხალხს, რომლებიც ცდილობენ გართობა შემოგთავაზონ ამ ბინძურ, მაგრამ ასეთ ლამაზ ქალაქში.