ბოსტონიდან ვაშინგტონისკენ ღამის ავტობუსი გველოდა. ყველაზე იაფი ადგილები გვქონდა - 20$ ორ ადამიანზე. მგზავრობის დრო - 10 საათი. ადვილი არ არის, მაგრამ დიდი ეკონომიისთვის მოთმენა შეიძლება (სხვა ბილეთები ერთ ადამიანზე დაახლოებით 40$ ღირს).

ახლა კი მე და საშასგან თქვენთვის ლაიფჰაკი. როგორ შეინახოთ ბარგი იაფად ან სულაც უფასოდ სეირნობის დროს? მოძებნეთ სასტუმროები ავტოსადგურთან ახლოს, დარეკეთ და ჰკითხეთ, რა ღირს ეს მომსახურება. ჩვენ ვიპოვეთ ადგილი, სადაც ამას სრულიად უფასოდ გვთავაზობენ! აღვნიშნავ, რომ სადგურზე ამაში 4 საათისთვის 30$-ს იღებენ თითო ჩემოდანზე.

ვაშინგტონი აშშ-ის დედაქალაქია. ქალაქის დასათვალიერებლად ერთი დღეც საკმარისია. სწორედ ეს მომეწონა: საერთოდ არ ჰგავს ამერიკის სხვა ქალაქებს. სხვა არქიტექტურა, არ არის ცათამბჯენები, ხოლო ქუჩები თითქოს ამერიკული სულითაა სავსე. უამრავი უფასო მუზეუმი ყველა გემოვნებისთვის, რომლებიც მართლაც შთამბეჭდავია. რა თქმა უნდა, მთავარი ღირსშესანიშნაობა კაპიტოლიუმი იყო. უზარმაზარი თეთრი შენობა, რომლის ნახვასაც სურათებში მიჩვეულები ვართ. მახსოვს, მოპირდაპირე სკამზე ვიჯექი და ვერაფრით ვაცნობიერებდი, რომ ამ მთელ სილამაზეს რეალურ ცხოვრებაში ვხედავდი და არა ფოტოებზე. ასევე, ბუნებრივია, აუცილებელია თეთრი სახლის მონახულება. გულწრფელად ვიტყვი, მაშინვე ვერ მივხვდი, როგორ გამოიყურება. მხოლოდ მაშინ, როცა დავინახე პოლიციით გარშემორტყმული პატარა თეთრი შენობა და ხალხის მცირე ჯგუფი, რომლებიც თეთრი სახლის ფონზე იღებდნენ ფოტოებს.