ფაქტი No5 - მეგობართან ერთად ამერიკაში წასვლა = 24/7 სიცილით სიკვდილი. ეს არის ის სტერეოტიპი, რომლის დარღვევას არცერთი ჩვენგანი არ აპირებდა. მხოლოდ დაფიქრდით! რა შეიძლება იყოს იმაზე უკეთესი, ვიდრე საუკეთესო მეგობართან ერთად ამერიკაში 4 თვით წასვლა! როცა 12 წლის ვიყავით, მხოლოდ ამაზე შეგვეძლო ოცნება, 2018 წლის მაისში კი თავდაჯერებულად დავდიოდით Time Square-ზე, ვესაუბრებოდით გამვლელებს და საღამოობით ვჭამდით იმავე ნიუ-იორკულ ჩიზქეიქს. და თუნდაც ეს ზაფხული არ ყოფილიყო ყველაზე მარტივი, ის ნამდვილად იყო ყველაზე დაუვიწყარი. რატომ? სამსახურიდან 120%-ით დაღლილი მოსვლა, მაგრამ აუცილებლად რაიმე გემრიელის მომზადება; ბორნით ატლანტის ოკეანის ტალღებზე სრიალი და 3 ვეშაპისა და ერთი ზღვის კატის შეხვედრა; ღამის 3 საათზე გაღვიძება, რათა Cadillac Mountain-ის მწვერვალზე მზის ამოსვლა შეგვხვედროდა, შემდეგ კი იმავე საცხობში წასვლა ახლად გამომცხვარი გოგრისა და დარიჩინის კექსით საუზმისთვის (რომელზეც, სხვათა შორის, კუნძულის მცხოვრებლები უბრალოდ ჭკუას კარგავენ); ღამით ოკეანეში ბანაობა; ვერტმფრენით ექსკურსიის დროს იმ კუნძულის ხედებით ტკბობა, სადაც მთელი ზაფხული ვცხოვრობდით; 50-ზე მეტი სახეობის ნაყინის გასინჯვა; ღამით წყვილი ირმისა და გარეული ინდაურების გუნდის შეხვედრა. და მთელი ზაფხული იმაზე ფიქრი, თუ როგორ დავგეგმავდით სამსახურის დასრულების შემდეგ იმ სანუკვარ ორ კვირას. ჩვეულებრივ წარმოუდგენლად ფრთხილებმა, გადავწყვიტეთ სრულიად დაგვევიწყა ის, რაც მოვიფიქრეთ და ყველაფერი დინებას მივანდეთ. პირველი ქალაქი - ბოსტონი. იქ ჩასულებს გვქონდა უამრავი ჩანთა და ველური სურვილი, გაგვეტარებინა ეს დრო ისე, რომ არავის დაეჯერებინა, რომ ეს ჩვენ გადაგვხდა. ბედნიერი დამთხვევით, სწორედ ბოსტონში შევხვდით ჩვენს ნაცნობებს, რომლებთან ერთადაც პირველად გავსინჯეთ ხამანწკები, მივაღწიეთ ჰარვარდამდე და ქალაქის სხვა ღირსშესანიშნაობებამდე. უზარმაზარი ქალაქის ქუჩებში სიარული, რომლის შესახებაც ამდენი გსმენია, შენს მეგობრებთან ერთად, ალბათ ისაა, რასაც ყველას ვუსურვებდით. ეს არის ის, რისთვისაც ღირდა სახლიდან 7000 კმ-ით შორს გაფრენა, რისთვისაც ღირდა მუშაობა, რასაც აუცილებლად გავიმეორებდით. ბოსტონის ნახვის შემდეგ, ჩვენ ორნი მივედით აეროპორტში, საერთოდ არ ვიცოდით, სად გვინდოდა წასვლა და მხოლოდ გაფრენის დროზე დაყრდნობით ვიყიდეთ ბილეთები ჩიკაგოში.

ჩიკაგო არის ფირუზისფერი არხები, რომლებიც მოხერხებულად მიიკლაკნება ცათამბჯენებს შორის, ეს არის გასახსნელი ხიდები, მეტრო პირდაპირ საფეხმავლო ქუჩების ზემოთ, რომლებიც ლამის ეხება სარკისებურ შენობებს; ეს არის ყველასთვის ცნობილი Bean, ყველაზე გემრიელი deep-dish pizza, წარმოუდგენელი რუფტოპები, ჯაზ-ბარები და მიჩიგანის ტბის ხედები. ჩიკაგოში ჩვენ ორსართულიანი ავტობუსით დავდიოდით ღამის ქალაქში, გულუბრყვილოდ ვადარებდით მას ბოსტონს, მთელი ღამე დავდიოდით ქუჩებში, ქალაქის მეორე ბოლოში დავდიოდით საუზმეზე ლამაზი ჭურჭლის გამო, იქ გავსინჯეთ ჩვენი ცხოვრების ყველაზე ცხარე მაკარონი. შემდეგი დანიშნულების ადგილიც სპონტანურად შეირჩა და 9 საათის შემდეგ უკვე ლოს-ანჯელესის ჰოსტელში ვსახლდებოდით. მაშინ პირველად აღმოვჩნდით ისეთ პატარა ოთახში, რომ იძულებულნი ვიყავით რიგრიგობით გვესროლა ჩემოდნები საწოლზე, რათა ტანსაცმელი გამოგვეღო, უბრალოდ იმიტომ, რომ იატაკზე მათთვის ადგილი არ იყო. მაშინ პირველად გავიგეთ „3-ზე 3-ზე ოთახის“, საერთო ჭერისა და ჰოსტელების მთელი რომანტიკის მნიშვნელობა. ვცდილობდით რაც შეიძლება სწრაფად დაგვეტოვებინა ჩვენი საცხოვრებელი, გავემართეთ ქალაქის დასაპყრობად. და აი, იმ ცნობილი “hollywood”-ის წარწერასთან ახლოს მდგომებს, გვეგონა, რომ ყველაზე მაგარ ამერიკულ ფილმში მოვხვდით. არ ჩავუღრმავდებით ამ ქალაქში მოგზაურობის დეტალებს, იქ წასვლა არ იყო საუკეთესო სპონტანური გადაწყვეტილება, როგორც აღმოჩნდა, ეს ადგილი ჩვენთვის არ იყო.

ნიუ-იორკი იყო ერთადერთი ქალაქი, რომლის ბილეთებიც წინასწარ ვიყიდეთ. დილით ადრე გაღვიძებულებმა ტაქსი გამოვიძახეთ, კმაყოფილები ჩავსხედით უკანა სავარძელზე, ახალი ქალაქის მოლოდინში. მაგრამ ვერც კი წარმოვიდგენდით, რომ ლოს-ანჯელესის საცობები არაფრით ჩამოუვარდებოდა ნიუ-იორკულს. და ტაქსიში 2,5 საათის გატარების შემდეგ, საბოლოოდ დავაგვიანეთ ჩვენს რეისზე. აეროპორტში მისვლისას ძალიან გულმოდგინედ ვუხსნიდით Virgin Airlines-ის თანამშრომლებს, რომ დავაგვიანეთ ჩვენს თვითმფრინავზე და რომ აუცილებლად უნდა გავფრენილიყავით ნიუ-იორკში. მაშინ ბევრი არ უფიქრიათ, შემოგვთავაზეს ისეთი რამ, რაზეც უარს ვერ ვიტყოდით (არავინ იტყოდა უარს). ბედნიერი დამთხვევით, ნიუ-იორკისკენ მიმავალი შემდეგი რეისის ბიზნეს-კლასი ნახევრად ცარიელი იყო. და აი, ჩვენ უკვე ღირსეულად ვსვამთ ყავას და ვუყურებთ “საუზმე ტიფანისთან”-ს ყველაზე მაგარ ადგილებზე! როგორც ამბობენ: “ყველაფერი, რაც ხდება, უკეთესობისკენ არის”.

თუ გახსოვთ, რით დაიწყო ჩვენი ამბავი, ეს იყო 4 ბავშვი მანჰეტენის ცენტრში, 21-ე სართულზე. ჩვენი მოგზაურობის ბოლოს შეხვედრისას, დაუღალავად ვუზიარებდით ერთმანეთს ჩვენს შთაბეჭდილებებს, ისტორიებსა და ემოციებს, ვაგრძელებდით სეირნობას და ქალაქის ატმოსფეროთი ტკბობას.

4 თვის შემდეგ სახლში დაბრუნება საკმაოდ უცნაური იყო. ჩვეულებისამებრ დავსხედით თვითმფრინავში გვერდიგვერდ, ჩავრთეთ Alicia Keys - Empire State of Mind, თვითმფრინავმა დაიწყო სიმაღლის აკრეფა, თითოეული ჩვენგანი კი გონებაში ატრიალებდა იმ ზაფხულის ყველაზე მნიშვნელოვან მომენტებს, თან ვმღეროდით: “These streets will make you feel brand new, big lights will inspire you...”, ვაკვირდებოდით შორს მიმავალი ცათამბჯენების კონტურებს. ყველაზე წარმოუდგენელი ისაა, რომ ყველა ეს მომენტი გააგრძელებს ჩვენთან ერთად ცხოვრებაში სიარულს. ბოლოს და ბოლოს, ჩვენი მოგონებები არის ყველაზე დიდი საგანძური, რომელსაც ვერავინ ვერასდროს წაგვართმევს. იმოგზაურე!