უფასო ველოსიპედი აშშ-ში

J-1 სტუდენტისთვის ველოსიპედი გადაადგილების მთავარი საშუალებაა: ავტობუსები გაუგებარი გრაფიკით დადიან, ფეხით სიარული კი ძალიან დიდ დროს მოითხოვს. სად ვიშოვოთ? ზოგი მაღაზიაში ყიდულობს ახალს. ზოგი Craigslist-ზე ეძებს, ზოგი სტუდენტურ ცენტრებში იღებს, ზოგიც სხვა გზებს ეძებს. სხვა გზებში ვგულისხმობ საეკლესიო ორგანიზაციების, ფონდების ან სხვა პირების ძიებას.

ჩემს პირველ ზაფხულს წავაწყდი სავიზიტო ბარათებს, სადაც ვიღაც პაპა დენი უფასო ველოსიპედს გვთავაზობდა. რა არის აქ საეჭვო? როგორც აღმოჩნდა, არაფერი. პაპა დენი იყო ძალიან მორწმუნე მოხუცი, რომელიც 65+ ასაკში ინსტაგრამს იყენებდა და სთავაზობდა უფასო ველოსიპედს მასთან სელფის გადაღებისა და ფოტოს გამოქვეყნების სანაცვლოდ.

მივედით მასთან. კეთილი კაცია. ეხმარება სტუდენტებს ველოსიპედებით. მთელი უკანა ეზო სავსე იყო გაფუჭებული ველოსიპედებით. ავირჩიეთ კარგი ველოსიპედი, გადავიღეთ ფოტო და წამოვედით. თუმცა, ცოტა ვინერვიულეთ.

რამდენიმე კვირის შემდეგ ველოსიპედი მომპარეს. ამას იმიტომ ვამბობ, რომ აუცილებელია ბოქლომის ყიდვა, ეს ძალიან მნიშვნელოვანია. წავედი და კიდევ ერთი ავიღე. პაპა დენის მე უკვე აღარ ვახსოვდი.