What happens in Vegas stays in Vegas. სწორედ ეს ცნობილი ფრაზა შეგხვდებათ ჯერ კიდევ აეროპორტში, და, რა თქმა უნდა, სათამაშო ავტომატები. სათამაშო ავტომატები აქ ყველგან არის, მაშინაც კი, თუ თქვენ აქ ჩამოხვალთ იმ მტკიცე რწმენით, რომ ავტომატებზე არ დახარჯავთ დაგეგმილ თანხაზე მეტს ან საერთოდ არც ერთ ცენტს - ნუ მოტყუვდებით, ინვესტორებს ეს ოაზისი უდაბნოს შუაგულში იმისთვის არ აუშენებიათ, რომ თქვენ „უბრალოდ სანახავად ჩამოხვიდეთ“. მით უმეტეს, კრიზისთან დაკავშირებით, აქ შეიცვალა მოგების მიღების სისტემა, რომელიც აღარ ცვივა მელოდიური წკრიალით ავტომატებიდან, არამედ ირიცხება გარკვეულ ანგარიშზე, რომლის განაღდებაც შეგიძლიათ თამაშის დასრულების შემდეგ სპეციალურ ბანკომატებში. ახლა საკითხი მხოლოდ იმაშია, რომ დაასრულოთ თამაში მანამ, სანამ წააგებთ მთელ ფულს, მოგებულთან ერთად. კარგია, რომ მაინც შენარჩუნებულია მოთამაშეების დაწესებულების ხარჯზე ალკოჰოლური(!) კოქტეილებით გამასპინძლების ტრადიცია. საერთოდ, უნდა ითქვას, რომ კოქტეილები ლას-ვეგასში – ზუსტად ისაა, რაც საჭიროა!
მე ლას-ვეგასში პირველად ვიყავი და, რა თქმა უნდა, პირველ რიგში მაინტერესებდა პოპულარულ ტურისტულ ქუჩაზე – Strip-ზე მდებარე სასტუმროები, სხვა ქუჩებამდე ჩემი იქ ყოფნის სამი დღის განმავლობაში ვერ მივაღწიე. ამ ქუჩაზე თითოეული სასტუმრო ღირსშესანიშნაობაა. ზოგიერთი სასტუმრო აშენებულია ცნობილი ქალაქების ან ადგილების სახით – Paris, New York, The Venetian, Luxor. თანაც, ისინი ქმნიან ამ ადგილების ატმოსფეროს არა მხოლოდ გარედან, არამედ შიგნიდანაც – თავის თავში ათავსებენ მრავალრიცხოვან ქუჩებს მაღაზიებითა და რესტორნებით, ხოლო The Venetian-ში – კიდევ ნამდვილ არხებს გონდოლებითა და მომღერალი გონდოლიერებით. ხოლო სასტუმროების ჭერზე დახატული ცა გაიძულებს დაივიწყო, რომ შენობაში იმყოფები, შემდეგ კი საერთოდ იწყებ არევას, როდის ხარ გარეთ და როდის – შიგნით. თუმცა გარეთ დღისით ყოფნა თითქმის შეუძლებელია – 50-გრადუსიანი სიცხე, მხოლოდ მრავალრიცხოვან მექსიკელებს შეუძლიათ ამის ატანა, მათი საქმე ხომ ესაა: იდგნენ და ტურისტების წინ ატრიალონ ესკორტის გოგონების სავიზიტო ბარათები. სავიზიტო ბარათებისა და მექსიკელების რაოდენობის მიხედვით, ლას-ვეგასში მათი ბიზნესი კარგად მიდის. Sin City, ბოლოს და ბოლოს. სამაგიეროდ ღამით ლას-ვეგასში ძალიან კომფორტულია – 28 გრადუსი და მექსიკელები თითქმის არ არიან.
ამერიკელები ხშირად ჩამოდიან ლას-ვეგასში შოუების სანახავად. აქ ტარდება მსოფლიოში საუკეთესო შოუები ნებისმიერი გემოვნებისთვის: ეროტიკული, ვარსკვლავების მონაწილეობით, ბავშვებისთვის, კლასიკის მოყვარულთათვის და ისევ ეროტიკული, ისინი აქ მაინც უფრო მეტია! შოუები არის ფასიანი – მათი ღირებულება 100$-ს აჭარბებს, და უფასო – და ასევე სრულიად განსაცვიფრებელი – Sirens of Treasure Island, Streetmosphere, Bellagio-ს სასტუმროს მომღერალი შადრევნები და სხვა, რომელთა შესახებაც ინფორმაციის მიღება შეიძლება უფასო ბუკლეტიდან, რომლის პოვნაც შესაძლებელია სასტუმროებსა და სავაჭრო ცენტრებში.
ლას-ვეგასში შესაძლებელია სუვენირების შეძენა მთელი ოჯახისთვის და აღარ ინერვიულოთ ამაზე სამშობლოში დაბრუნებამდე. ამის გაკეთება ყველაზე მომგებიანად შეიძლება Wallgreens-ისა და ABC Stores-ის მაღაზიებში. ეს დიდი მაღაზიებია, რომლებსაც თქვენ აუცილებლად იპოვით Strip-ის ქუჩაზე.
ხოლო როცა მიდიხარ ლას-ვეგასიდან – ცოტა სევდიანია, რადგან იქ მარადიული დღესასწაულია, შენ კი უბრუნდები ყოველდღიურობას. და უკვე რამდენიმე დღეში მოგეჩვენება, რომ ლას-ვეგასი იყო სიზმარი, ზღაპარი, ხოლო სინამდვილეში არაფერი მსგავსი არც ყოფილა!
