Келесі аялдамамыз Ки-Уэст (Key West) болды. Бұл жерді бәрі біле бермейтін шығар, сондықтан түсіндіре кетейін: Флорида-Кис (Florida Keys) – Флориданың оңтүстігіндегі аралдар тізбегі, ал Ки-Уэст – солардың ішіндегі ең оңтүстігі.

Автобусымыз соңғы аралға жеткенде кешкі сағат 10-дар шамасы еді. Асықпай жиналып, есіней-керіле автобустан түстік те, құлап кете жаздадық! Мен баспалдақта тұрып, ауаны жұта алмай, тоя дем алып тұрдым. Осы тәтті кешкі ауада еріп кеткім келді... Онда бәрі араласып кеткен еді: гүлдердің иісі, теңіз самалы, күннің соңғы жылуы және сигараның ащы түтіні... Өмірімде бірінші рет дем алуды үйренгенімді сезіндім.

Бұл жерді қандай сөзбен сипаттау керектігін білмеймін... Америка туралы білетіндеріңіздің бәрін ұмытыңыз да, бір жағынан Атлант мұхиты, екінші жағынан Мексика шығанағы жуып жатқан кішкентай аралды елестетіп көріңіз. Көшелерінде кокос сатып, сигара орайтын кубалықтар толы жер. Әлемдегі ең дәмді бәліш – Key West Lime Pie пісірілетін жер. Әр кеш сайын жағалауда күннің батуын бимен, шоумен және отшашумен тойлайтын жер. Елестетіп көруге болады, бірақ өз көзіңізбен көрген әлдеқайда жақсы. Сеніңіздер, ол жерден өзіңізге ұнайтын іс табасыз! #KeyWest #FloridaKeys