Соңғы жұмыс күні, заттарымызды жинап, саяхатқа аттандық! Алда бізді Бостон, Вашингтон және Нью-Йорк күтіп тұр. Маршрут қымбат болмады. Алдымен Хаянистен Бостонға «Peter Pan» автобусымен бардық, билетке 7$ төледік. Вокзалда чемодандарымызды кәдесый сататын ағайға қалдырдық. Оның чемодандарға арналған арнайы бөлмесі бар және ол өте танымал. Ол басқа жерлерге қарағанда екі есе арзан алады. Жеңіл жүріп, қаланы аралауға асықтық. Бостонның жастар қаласы деп аталуы тегін емес. Дәл осы жерде атақты университеттер мен мектептер орналасқан. Біздің тізімде бірінші, әрине, Гарвард болды. Жолымыз болып, студенттерді қабылдау рәсіміне тап болдық. Олардың бәрі қандай көңілді, әдемі және ұқыпты. Өзімізді студенттер туралы америкалық фильмге немесе сериалға түсіп қалғандай сезіндік. Ал университеттің өзі – қызыл кірпіштен салынған әдемі және алып ғимараттар. Міндетті түрде баруға кеңес беремін, өйткені суреттер де біздің алған әсерімізді жеткізе алмайды.

Одан кейін «Массачусетс технологиялық университетін (MIT)» көруге бардық. Ол жерге тіпті ішке де кіргізеді! Бұл шынымен де болашақ ғалымдар, мамандар мен өнертапқыштардың атмосферасына тап болу. Әр бағыт үшін зертханалар бар, онда зерттеуге қажетті барлық жабдықтар бар. Біз барған кезде студенттер сол жерде болып, қызығушылықпен бір нәрселерді қарап, тәжірибелер жасап жатты. Алып асханалар, жаңа дәрісханалар, демалыс бөлмелері мен сыныптар. Оқу қызықты болуы үшін бәрінің дайын болғаны қандай керемет.

Бостон жағалауымен серуендеуді жөн көрдік. Қараңғы түсіп, үйлердің шамдары ерекше жайлылық сыйлады. Мұнда өзіңді бөтен сезінбейсің, мүмкін, дәл сол себепті бұл қала бізде ең үлкен әсер қалдырды.