Біз өте кеш келдік, сыртта қараңғы түсіп кеткен еді. Маусымның қызған шағында мұнда жақсы әрі қолжетімді баспана табу қиын, сондықтан біз бұған алдын ала қамдандық. Автовокзалдан такси ұстадық, ол кезде көрші көшеде тұратынымызды білмеппіз Үйді әрең таптық, өйткені өте қараңғы болды және оны тек фотосуреттен бір рет қана көрген едік. Үй иесімен және жаңа көршілерімізбен қысқаша сөйлескеннен кейін, аман-есен орналастық.

Тұрғын үй үшін біз аптасына бір адамға 100$ төлейміз. Біздің иелігімізде екі кісілік бөлме, ортақ жуынатын бөлме, зал, ас үй және керемет көрінісі бар балкон (үйдегі ең сүйікті орным) бар. Біз көп жылдар бұрын АҚШ-қа көшіп келген жігіттермен бірге тұрамыз, олар Филадельфияда тұрады (біздің қаладан бірнеше сағаттық жерде), ал Wildwood-қа жұмыс істеуге келеді. Жақында бізге орыс тілді құрбыларымыз көшіп келді. Нәтижесінде үлкен халықаралық отбасы болып шықтық Айтпақшы, үйдің орналасқан жері өте ыңғайлы. Он минуттық жерде жағажай және он бес минуттық жерде біздің мейрамханамыз бар (бірақ ол туралы сәл кейінірек).

Біздің қалашық туралы не айтуға болады?

Атлант мұхитының жағасында орналасқан типтік американдық туристік қала. Wildwood ең алдымен өзінің таза аппақ құмы бар үлкен жағажайымен танымал. Жағажайдың жалпы ұзындығы 2,9 шақырым. Мұнда негізінен жақын маңдағы штаттардан келген американдықтар мен канадалықтар демалады. Қаладағы ең танымал және шулы орын - Boardwalk. Бұл әртүрлі дәмханаларға, мейрамханаларға, кәдесый дүкендеріне, ойын автоматтарына және т.б. толы тұтас бір көше (жергілікті жағалау). Сондай-ақ онда үш шағын аттракциондар паркі бар. Жеке өзім тек бір американдық тауда (американские горки) сырғанап үлгердім, қалғаны әзірге жоспарда ғана, адреналин маған жеткілікті болды (соңғы кездері тым қорқақ болып кеткен сияқтымын).

Жеке менің үлкен махаббатым - үлкен құмды жағажай және тап-таза мұхит. Жағажайда өзімді қандай да бір американдық фильмде жүргендей сезінемін: толқындар, шағалалар, сұлу серферлер және Америка туы бейнеленген шолақ шалбар киген көптеген американдықтар Мұнда күн сайын дельфиндерді көруге болады, өйткені олар адамдардан мүлдем қорықпайды, шаяндар көп, ал бірнеше күн бұрын мен скатты басып кете жаздадым