Елді мекеннің ішіне қарай жылжыған сайын, жол бойында әртүрлі құрылыстар пайда бола бастады. Бір баспана біздің назарымызды аударды. Ашық түске боялған қабырға, бояу баллондары – мұның бәрі бізді өзіне тартты, біз жай ғана өтіп кете алмадық.
Қызықтап қараумен болып, қасымызға әйелдің жақындағанын байқамай қалдық. Бұл лашық иесі еді. Қайдан келгенімізді сұраған соң, ол қабырғаға естелік ретінде жазу қалдыруды ұсынды. Біз қуана келісіп, Slab City-де өмір сүрудің қандай екенін білуді жөн көрдік. Тұрғын өзі таңдаған өмір салтына риза екенін және оны жалғыз мазалайтын нәрсе – асырап алған мысығына жем алуға ақшаның әрдайым жете бермейтінін айтты.
Қалашық тұрғындарының көпшілігі жұмыссыздық бойынша жәрдемақыға өмір сүреді. Ал жолы болмағандары өз қолдарымен бірдеңе жасап, келуші туристерге немесе Slab City-ден 8-10 км қашықтықта орналасқан ең жақын Ниланд қаласының тұрғындарына сатады. Жазғы өте жоғары температурадан бөлек, тұрғындар үшін тағы бір мәселе – өзеннің тасуы, ол жиі өзен жағасында тұратындарды су астында қалдырады. Бірақ Slab City-де көп жылдан бері тұрып келе жатқандар өз баспаналарын өзеннен алыс алқапта салуға тырысады.
Біздің жаңа танысымызға келетін болсақ, ол күні бойы шөл далада әдемі шыны сынықтарын, ұлу қабыршақтарын, сүйектерді немесе тастарды іздеп жүреді, кейін олардан керемет әдемі әшекейлер жасайды. Иесіне деген ықыласымыз оянып, естелікке бірдеңе сатып алудан бас тарта алмадық.
Қалашық тұрғындарының өмірі сырт көзге көрінгендей жалықтырарлық емес.
Slab City аумағында шіркеу, кітапхана, тіпті скейт-парк те бар. Ал әр апта сайын мұнда музыкалық концерттер өтеді, онда бәрі жоғары деңгейде жабдықталған – сахна, бар, жұмсақ дивандары бар VIP қатарлар, жарықтандыру.
Мұнда бір апта өткізіңіз, мүмкін, сізде бұл қаладан кеткіңіз келмей қалар.
Біз айналаға көз жүгіртіп жатқанда, өз учаскесіне қазық қағып жатқан қарт кісі бізді шақырды. Ол өз баспанасын көрсетуді ұсынды.
Артық сөзсіз, ер адам данышпан болып шықты. Шөл далада электр қуатының жоқтығы оны мазаламайды. Оның «үйінде» тоңазытқыш, кір жуғыш машина, тіпті плита да жұмыс істейді, ал құнарсыз жерде көкөністер өседі.
Slab City-де ол қыздарымен бірге тұрады. Көршілерімен араласа ма деген сұрағымызға, ол бүкіл учаске бойынша қозғалыс датчиктері орнатылғанын, камералар тұрғанын және әр жағдайға қарсы, әрине, ерекше қонақжайлылық үшін мылтық сақтайтынын айтты.
Мүмкін, қалашықтағы өмір курорт емес шығар, бірақ досымыздың баспанасының ортасында бассейн бар және ол таза судың жетіспеушілігіне мүлдем алаңдамайды, өйткені ол суды сүзудің үш деңгейлі жүйесін жасап алған. Жалпы, әдемі өмір сүруге тыйым сала алмайсың...
Алайда, әңгіме ағартушылық туралы болғанда, бізге шұғыл кету керек болды.
Серуеніміз барысында барлық тұрғындар бірауыздан қаланың қақ ортасында орналасқан көше мұражайына міндетті түрде баруымыз керектігін айтты, біз сол жаққа бет алдық.
