Өміріміздегі кейбір шешімдер уақыт өте келе біздерді өкіндіріп жатады, бірақ адам баласын еш өкіндірмейтін бір нәрсе бар, ол-саяхат. Саяхаттау үшін жиған-терген ақшаң мен алтындай қымбат уақытыңды құртсаң да артық етпейді. Дүние-мүлікті өмірдің әрбір кезеңінде таба аласың, алайда жалындаған жастық шақта өткізген ерекше сәттер алтыннан да қымбат. Ел аралап, жер көру өмірдің жарқын тұстарын көрсетіп, сан кітаптар мен университеттер бере алмас, баға жетпес білімімен көзқарасыңды кеңейтеді. Қартайған шағымда өткен өміріме тек сүйсіне қарап, үлкен-кішіге шынайы баяндап беру үшін арманымдағы өмірге деген алғашқы қадамды дәл қазір бастауым керек деп ойлаймын.
Талай елдерге саяхаттаған адамдарды естіп-көріп жүрсем де , әрбір адамның саяхаттауға шексіз мүмкіндігі бар екенін Түркияға алғаш аяқ басқан сәтте түсіндім. Фильм мен сериалдардан көріп үйренген әсем табиғатты өз көзіммен көргенде, саяхат менің өмірімнің бір бөлшегі екеніне көзім жетті. Түркияның 5 жұлдызды отельінде жұмыс істеу барысында, жаңа мәдениетті сезіндім. Өзім бұрын соңды қонақ үй саласында жұмыс істемегендіктен, түрік тілін орта деңгейде білсемде, мен өзіме сенімсіз болып жұмысқа кіріскен едім. Әрдайым жұмыс басталудан бұрын қобалжуды сезінетінмін. Бірде маған ресторан ішінде жауапты жұмыс тапсырылды да:
-Қанша уақыт керек?-деп сұрады.
-30 минут,-деп жауап бердім де, жұмысқа кірістім. Бар жауапкершілікті өз мойныма алғандықтан, жұмысты тыңғылықты етіп орындауға тырыстым. Жарты сағаттан кейін шеф келіп, менің жұмысымнан қателік таба алмады. Содан соң:
-Afferin (жарайсың),- деді.
Дәл осы сәтте менің бойыма сенімділік ұялады. Осылайша уақыт өте келе, мен ресторан шефтері мен жанымдағы коллегаларымнан тек жылы сөздер ести бастадым. Менің жұмысты жақсы істейтінімді айтып, менімен бірге жұмыс істеуге асығатын жағдайға жетті. Осылайша Түркия маған сенімділік сыйлап, мен өз қабілетімді бағалауды үйрендім.
Басқа елге саяхаттап бару біздерді бақытқа бөлей түседі, десе де сол елде бірнеше ай өмір сүріп, өзге ұлттың өкілдерімен бір жерде тамақтанып, бірге қуанып, бірге мұңайып-сырласқан сәттерді ештеңемен айырбастау мүмкін емес. Дәл сондай сәтте қандай ұлт болсақ та, бәріміздің жер планетасында өмір сүретін “адам” деген жаратылыс екеніміз тағы да еске түседі. Осындай сезімдерден кейін мен «саяхаттау үшін берілген әрбір мүмкіндікті пайдалануым керек» деген шешімге келдім.
Қазіргі кезде студенттерге беріліп отырған ерекше мүмкіндіктің бірі - Work and Travel бағдарламасы. Бірнеше жылдар бұрын шет елге шығу, жұмыс жасау , саяхаттау сынды мәселелер мүмкін еместей болып көрінетін, бірақ қазіргі кезде әрбір адам материалдық жағдайына қарамастан өз өмірін осындай бағдарламалардың арқасында өзгерте алады, дами алады және саяхаттай алады. Жастардың сана-сезімін оятып қана қоймай, саяхаттың маңыздылығын көрсете отырып, қомақты қаржы табуға көмектеседі. Бағдарламаның арқасында жыл сайын көптеген студенттер Нью Йорк көшелерін аралап, Голливуд киноларында көрген тарихи жерлерге өз ізін қалдырып, ерекше сезіммен елге оралуда. Бағдарлама арқылы менде өзімнің бірнеше арман-мақсатымды шындыққа айналдыруды көздеймін.
Әрине, Американы көру кімнің де болмасын арманы, мен де осы жылғы мақсаттарымның тізіміне мұны қосып қойған болатынмын. Қиындық пен қорқынышсыз жетістіктің келмейтіні белгілі, жұмыс барысында да әртүрлі проблемалар туындауы мүмкін, бірақ үйден ең алғаш ұзағанымда, Астанаға үреймен оқуға кеткенімде, Түркияға тәуекел етіп кеткен сәттерімде де ішімдегі бір күш мені әрдайым алдыға итермелеген еді. Дәл қазіргі сәтте де Америкадай алпауыт елде жұмыс істеп-саяхаттауға дайын екенімді сезінемін. Ағылшын тілінде тұрғындармен сөйлесіп, өзге ұлт өкілдерімен танысып, миымдағы кейбір стеротиптерді жойсам деймін. Өз ортамды кеңейтіп, жаңа достар тауып , әртүрлі адамдармен араласқым келеді. Өзге елді танып-біліп қана қоймай, еліміздің әсем табиғаты, қонақжайлығы мен дәмді тағамдарымен бөлісіп, “Қазақстан” деген ел туралы түсінік қалыптастыруға бар күшімді салуды жоспарлаймын. Мамандығым туризм болғандықтан, өзге елдің жақсы жағын үйреніп , жаңа идеяларға жол ашу мен үшін өте маңызды болып табылады. Мұхит асып, жұмыс істеп, көзқарасымды кеңейтіп , болашақта өз елімді гүлдендіргім келеді. Өз сіңілдерім мен достарыма үлгі бола отырып , мақсатыма жетуді көздеймін.
Қойын дәптерімде жазылған осы жылғы маңызды мақсатымның бірі - әке-анама шет елде демалыс ұйымдастыру, нақтылай келсем, тарихқа толы Ыстамбулға саяхаттауға себепші болу болатын. Осы күнге дейін мен үшін төккен терлері мен ағарған шаштарын былай қойғанда, маған жұмсаған қаржыларымен бүкіл әлемді шарлап шыға алатын еді, әрине. Бірақ өзінің емес, баласының қамын көп ойлайтын ата-анамды адал тапқан табысыммен шет елге шығарып, жүздеріне күлкі ұялатсам деймін. Яғни, Work and Travel бағдарламасына қатысуымның келесі себебі, дәл осы балалық арманыммен тікелей байланысты.
Осылайша студенттердің өмірге деген құлшынысын оятып, жан-жақты мақсаттарын орындауға себепші болып, кемінде алғашқы қомақты табысын табуға көмек беретін Work and Travel бағдарламасының болашағы зор деп ойлаймын. Бағдарлама жыл сайын Америка арманына емес, мақсатына айналған жастар санын көбейтетініне сенімдімін. Уақыт өте келе бұл мүмкіндік тек студенттерге ғана емес, әртүрлі жастағы адамдарға да берілсе екен деймін. Шет ел көрген, өзін жан-жақты дамытқан, ағылшын тілінде еркін сөйлейтін , білімді жандардың саны көбейсе, бұл бар әлем үшін үлкен жетістік болар еді. Менің ойымша жүректегі арманды, күнделіктегі мақсатты, дәптердегі жоспарды шындыққа айналдыратын сәт келді! Бұл жолға бірге аттанайық, замандас!
