Қазір және болашақта.

Адам бұл өмірде жай ғана қонақ. Оны қалай өткізсе де өзі біледі. Кейбіреулер ағаш секілді бір орында өмір бойы тұруға қарсы емес, ал кейбір жандар жаңа елді көргісі келеді, өзі үшін жаңа жерді ашқысы келеді. Және де олардың азғантайы ғана саяхаттауға бел буады. Оларды қаһармандарға теңеуге болады, себебі олар өздеріне ешқандай кедергі мен қорқынышты қоймайды. Әрбір күнін жақсы және қуанышты сәттерге толтыруға асығады. Онымен қоймай, өзге адамдардың өмірін жақсарта да алады, жүздеріне күлкі сыйлайды. Өз өмірлерін түрлі қызықтар мен оқиғаларға толтыру арқылы олар күн сайын жанданады. Саяхат- өмірге деген құштарлық пен шабыттың жаңа лебін тудыруға көмектесетін дәрумендердің бірі.

Қазіргі кезде шетелде саяхаттауға, білім алуға немесе жұмыс істеуге арналған бағдарламалар таба білген адамға өте көп. Біздің айналамызда біз білмитін мүмкіндіктер сан алуан және өмірін қызыққа толтырам деген адам үшін ешқандай кедергі жоқ. Керек ақпаратты интернеттегі сайттардан немесе әлеуметтік желілерден таба білуге болады. Бастысы, құлшыныс пен ынта болса болды. Себебі, осы екеуінің арқасында адам еш сылтау айтпай, орнынан тұрып, өз арманын немесе мақсатын орындауға аттанады. Ондай адам әр мүмкіндікті жібермеуге тырысады.

Өзге елде дамып, оқып және саяхаттауға арналған түрлі бағдарламалар бар. Мектеп оқушыларына арналған FLEX-тен бастап, қазақстандықтарға арналып құрылған халықаралық «Болашақ» бағдарламасы және де жоғары оқу орнындағы студенттер арасында танымал Work and Travel, сонымен қатар әр ЖОО-ның академиялық ұтқырлық бағдарламалары секілді түрлі мүмкіндіктер бар. Бұлардың мақсаты бір: елдің ғана емес, Жер ғаламшарымыздың болашағы боп саналатын жастарды дамыту, әуелі, өзінің еліне көмек беруге ынталандыру боп табылады. Себебі біз білетіндей мемлекеттің жарқын болашағы- жастардың қолында. Егер біз – жастар - көзі ашық, көкірегі ояу адамдар бола білсек, елімізді алға жетелейтініміз анық. Бұл- біздің Отан алдындағы парызымыздың бірі.

Бұл бағдарламаға қатысуға бел байлаған негізгі себебіміз - санамыздың көкжиегінің кеңеюі, яғни тәжірибе жинау. Ойланып қарасақ, тек теледидар мен телефон экранынан көріп жүрген ғажайып Таймсквер мен Бостандық ескерткіші, Ниагара сарқырамасы, Диснейлэнд және тағы басқа жүрек жаулайтын жерлерді өз көзімізбен көру қуаныш пен мақтаныш сезімін сыйлайтыны анық. Ол жердегі әртүрлі ұлт өкілдерімен тіл табыса білу, жақындасу біздің коммуникативтік, іскерлік және бейімделе алу секілді дағдыларымызды дамытып жаңа деңгейге шығаратыны анық. Өзге мәдениет өкілдерімен танысу, жұмыс тәжірбиемізбен алмасу және достар табу- шынымен де керемет емес пе?!

Сонымен қатар біз өз елімізді жақсы жағынан таныстыра білуіміз керек, өйткені біз өз еліміздің өкілі ретінде бара жатырмыз. Оларды өзіміздің терең тарихпен, көркем мәдениетімізбен, қымбат салт-дәстүрімізбен таныстыру қызық болады деген ойдамын.

Екінші пайдасы ағылшын тілімді дамыту. Қазіргі кездегі деңгейім Intermediate, бірақ, бұған қарамастан бұл тілдің Отанында жүру тілдік деңгейімді әлде қайда арттыратыны сөзсіз. Бұл бағдарламының әр мамандық иесі үшін маңызы зор, себебі Америкада баға жетпес тәжірибе мен тіл үйрену- көп адамның арманы. Тілді жақсы білгенімнің арқасында түрлі әдебиеттерді, өзіме қажетті нақты және де шын ақпараттарды оқи аламын. Себебі қазіргі кездегі ақпараттар, форумдар мен конференциялар, маңызды ғылыми жаңалықтардың 90%-ке жуығы осы ағылшын тілінде жүзеге асырылып отырады. Сонымен қатар, магистратураны шетелде оқу мақсатым бар. Әрине, ол үшін ағылшын тілін білу көптеген елдер үшін міндет екенін білеміз. Сондай-ақ, волонтер-мұғалім болып, аз қамтылған отбасылардан шыққан балалар үшін сабақ бергім келеді. Осылайша, енді өсіп келе жатқан бүлдіршіндердің ағылшын тіліне деген махаббатын ашып, оларға әлемде көптеген мүмкіндіктер бар екенін көрсеткім келеді.

Үшінші маңызы ретінде- жауапкершілікке үйрену. Өз елімізде, өз жерімізде ата-анамыздан қатты жыраққа кетпегендіктен алаңсыз өмір сүріп жүрміз. Алайда, өзге елде өзге ұлттың мәдениетімен танысу арқылы адам тұлғалық түрде дамып, жан-жақты бола түсіп, жауапкершілікті сезіне білетіні сөзсіз. Себебі ол жерде жалғыз жүргендіктен өз өмірі мен әрекеттеріне өзі жауап беретін болады. Жауапкершілікті сезіну арқылы әрбір адам өзін қорқыныш, кедергі және жеңілу алдындағы үрейден босатады. Адам еркіндік пен жаңа бақытты сезіне бастайды.

Тағы бір пайдасы және осы бағдарламаның негізгі бір мақсаттарының бірі- мол қаражат табу. Тек тұлғалық дамып қана қоймай, бағдарламаға жұмсалған қаражатты ақтайтын және өзіңде де қалатын мөлшерде ақша табуға болады. Бұл қаражатқа өзімізге және жақындарымызға сыйлықтар алып, Американың көрікті жерлерін аралап демалып қайтуға болады. Шынымен де бұл керемет мүмкіндік!

Адам өз мақсаттарымен бірге дамып өсіп отырады. Себебі ол осы діттеген нәрселеріне жету үшін барын салатын болады. Бұл бағдарламаның жеке адам үшін де, бүтін ел үшін де берер пайдасы көп екені анық. Өйткені, біздер бәсекеге бейім, амбициозды, ашық және лидерлік қасиеттері басым адамдар ретінде қайтып оралатын боламыз. Туымызда бейнеленген қыран құс секілді көкке қанаттарын кең жайып самғай алатын тұлға боларымызға сенімдімін.

Болашақта бұл бағдарлама қандай болмақ? Қазірдің өзін де танымал бұл бағдарлама 20 жылдан кейін қалыпты нәрсеге айналады деген ойдамын. Бұдан 15-20 жыл бұрын өзге мемлекетте демалмақ түгіл, оқу мүмкін емес боп көрінгенімен, қазіргі кезде шекара асқандар тек жастар арасында емес, үлкендер арасында да жетерлік. Work and Travel арқылы Америкада жұмыс істеп дамып келіп жатқандар, шетелде білім алып жүргендер қаншама. Және де олар осы мүмкіндікті өзге жастарға жеткізу үшін атсалысып жатыр. Менің ойымша, болашақта бұдан да көбірек студенттер АҚШ-та болып қайтады, себебі қазіргі ұрпақ- жаңаға ұмтылатын, білімді, жан-жақты, өз мүмкіндіктерін жіберіп алмайтын саналы ұрпақ.

Бізге берілген қысқа ғұмырды қалай өткіземіз- ол өз еркімізде. Қазіргі жасайтын таңдауларымыздан біздің болашағымыз айқындалатын болады. Жастық шақта, энергиямыз бен күшіміз мол, миымыз тынық кезде біз көп нәрсеге дайынбыз: таулардан асып, мұхитты кесіп өтіп жаңа күннің артынан жүруге қауқарымыз жетеді. Өз армандарымыз бен мақсаттарымыздың артынан жүруді тоқтатпайық, қиындыққа мойынсұнбайық. Жақсылыққа деген сенім мен еңбек бізді талай асуларға жеткізетін болады. Қай жаста болмасын жаңаға ұмтылуды тоқтатпау керек. Адам шын қалаған нәрсесіне қалай да болсын жетеді. Және бәрімізге сол бақытты сәтті бастан өткізуді бұйыртсын!