What happens in Vegas stays in Vegas. Aynan shu mashhur ibora sizni aeroportdayoq kutib oladi, albatta, o'yin avtomatlari ham. O'yin avtomatlari bu yerda hamma joyda, hatto siz bu yerga avtomatlarga belgilangan summadan ortiq yoki umuman bir sent ham sarflamaslik haqidagi qat'iy qaror bilan kelsangiz ham, o'zingizni aldab o'tirmang — investorlar bu vohani cho'l o'rtasida siz "shunchaki tomosha qilish uchun kelishingiz" uchun qurishmagan. Qolaversa, inqiroz munosabati bilan bu yerda yutuqni olish tizimi o'zgartirildi: u endi avtomatlardan jarangdor qo'ng'iroq bilan to'kilib tushmaydi, balki maxsus hisob raqamiga o'tkaziladi, uni o'yinni tugatganingizdan so'ng maxsus bankomatlarda naqdlashtirishingiz mumkin. Endi asosiy masala — barcha pulingizni, shu jumladan yutuqlarni ham yutqazib qo'ymasdan o'yinni tugatish. Yaxshiyamki, o'yinchilarni muassasa hisobidan alkogolli(!) kokteyllar bilan siylash an'anasi saqlanib qolgan. Umuman olganda, Las-Vegasdagi kokteyllar – gap yo'q!
Men Las-Vegasda birinchi marta bo'ldim va albatta, meni birinchi navbatda mashhur sayyohlik ko'chasi – Strip'dagi mehmonxonalar qiziqtirdi, uch kunlik tashrifim davomida boshqa ko'chalarga borishga ulgurmadim. Bu ko'chadagi har bir mehmonxona – diqqatga sazovor joy. Ba'zi mehmonxonalar mashhur shaharlar yoki joylar ko'rinishida qurilgan – Paris, New York, The Venetian, Luxor. Qolaversa, ular bu joylarning muhitini nafaqat tashqaridan, balki ichkaridan ham yaratadi – o'z ichiga do'konlar va restoranlar bilan to'la ko'plab ko'chalarni, The Venetian'da esa hatto gondolalar va qo'shiqchi gondolyerlar bilan haqiqiy kanallarni ham joylashtirgan. Mehmonxona shiftiga chizilgan osmon esa bino ichida ekanligingizni unutishga majbur qiladi, keyin esa tashqarida yoki ichkarida ekanligingizni adashtira boshlaysiz. Garchi kunduzi tashqarida bo'lish deyarli imkonsiz bo'lsa-da – 50 daraja issiq, faqat ko'plab meksikaliklarning qo'lidan keladi, ularning ishi shunaqa: sayyohlar oldida fohishalarning tashrif qog'ozlarini shiqillatib turish. Tashrif qog'ozlari va meksikaliklar soniga qaraganda, Las-Vegasda ularning biznesi yaxshi ketmoqda. Sin City, nima ham derdik. Ammo kechasi Las-Vegasda juda qulay – 28 daraja va meksikaliklar deyarli yo'q.
Amerikaliklar Las-Vegasga ko'pincha shoularni tomosha qilish uchun kelishadi. Bu yerda dunyodagi eng yaxshi shoular har qanday did uchun o'tkaziladi: erotik, yulduzlar ishtirokidagi, bolalar uchun, klassika ixlosmandlari uchun va yana erotik, baribir ulari ko'proq! Shoular pullik – ularning narxi 100 dollardan oshadi, va bepul – ular ham juda ajoyib – Sirens of Treasure Island, Streetmosphere, Bellagio mehmonxonasining qo'shiqchi favvoralari va boshqalar, ular haqidagi ma'lumotni mehmonxonalar va savdo markazlarida topish mumkin bo'lgan bepul bukletlardan olish mumkin.
Las-Vegasda butun oila uchun esdalik sovg'alari xarid qilish va vataniga qaytguncha bu haqda qayg'urmaslik mumkin. Buni eng foydali tarzda Wallgreens va ABC Stores do'konlarida amalga oshirish mumkin. Bular siz Strip ko'chasida albatta topadigan katta do'konlardir.
Las-Vegasdan ketayotganda esa biroz g'amgin bo'lasan, chunki u yerda abadiy bayram, sen esa kundalik hayotga qaytmoqdasan. Bir-ikki kundan keyin esa Las-Vegas tush, ertak bo'lib tuyuladi, aslida esa bunday narsa bo'lmagandek!
